Mae’r ddeuawd Dom a Lloyd wedi dweud y gallai gigiau ar-lein wneud y sin gerddoriaeth yn “fwy hygyrch” wedi iddyn nhw berfformio yn eu gig rithiol gyntaf. 

Ddydd Sadwrn, perfformiodd y rapwyr o flaen cynulleidfa rithiol – y tro cyntaf i gig o’r fath ddigwydd drwy’r Gymraeg. 

Roedden nhw wedi defnyddio technoleg arbennig oedd yn caniatáu iddyn nhw berfformio o flaen torf o bobl mewn gofod rhithwir (‘virtual space’). 

Ac er bod rhai yn pryderu am ddylanwad cynyddol technoleg ym myd y celfyddydau, mae’r ddeuawd yn credu y gallai gigiau o’r fath wella hygyrchedd yn y diwydiant. 

Wrth siarad â Newyddion S4C dywedodd Lloyd Lewis: “Sai'n credu bod e'n fygythiad i gigs go iawn oherwydd gigs go iawn, chi methu substitiwtio yr egni 'na chi'n cael os chi 'na yn y cnawd fel petai. 

“Ond hefyd mae hyn jyst yn rhywbeth gwbl newydd sbon. 

“Mae bendant lle i gigiau fel hyn a mae'n 'neud e mwy hygyrch i pobl i cael dod i'r gigs, nhw'n gallu e 'neud e o'u hystafell gwely felly mae hwnna'n rhywbeth sydd yn rili, rili diddorol am yr holl beth.” 

Image

'Pwerus'

Roedd modd i unrhyw un dros 13 oed yn y DU fynychu drwy ddilyn dolen neu gôd QR gan roi’r cyfle iddynt greu cymeriad rhithiol i’w hunain ac ymuno â’r gynulleidfa. 

Roedd Dom a Lloyd hefyd yn cael gweld a chlywed eu cynulleidfa gan olygu bod modd iddynt gyfathrebu â nhw. 

Mae’r ddeuawd wedi disgrifio’r cyfle i greu hanes gyda’r perfformiad fel “braint.” 

Dywedodd Dom James ei fod yn cydnabod y gallai’r dechnoleg greu heriau pe bai’n cael ei chamddefnyddio. 

Image

Ond mae’n credu y byddai gigiau o'r fath yn “ychwanegu” at y diwydiant. 

“Fi'n teimlo fel lle mae'n mynd efo technoleg nawr pethau fel hwn, virtual reality, AI a stwff fel 'na, mae jyst yn mynd i adio i'r industry,” meddai. 

“Fi yn teimlo fel mae 'na cwpwl o cwestiynau sydd dal fan 'na: 'Ydy e'n helpu neu ydy e'n 'neud e'n gwaethaf?'

“Ond fi'n meddwl os ni'n defnyddio fe'n gywir mae gallu bod yn pwerus iawn.”