Mae arweinwyr Ewrop wedi rhybuddio bod yn rhaid i Wcráin ei hun fod yn rhan o unrhyw drafodaethau heddwch. 

Nos Sadwrn, cyhoeddodd y gwledydd Ewropeaidd a oedd yn rhan o gyfarfod diogelwch munud olaf yn Chevening yng Nghaint ddatganiad.

"Nid oes modd penderfynu ar y llwybr i heddwch yn Wcráin heb Wcráin," meddai'r datganiad ar y cyd gan arweinwyr y DU, Ffrainc, yr Eidal, yr Almaen, Gwlad Pwyl, y Ffindir a'r Comisiwn Ewropeaidd. 

Daeth y rhybudd ar ôl i Arlywydd yr Unol Daleithiau, Donald Trump gyhoeddi y byddai'n cyfarfod Arweinydd Rwsia, Vladimir Putin yn Alaska ddydd Gwener.

Mae disgwyl i'r ddau arlywydd drafod y rhyfel yn Wcráin, gan ganolbwyntio'n benodol ar sut i ddod â'r rhyfel yno i ben.  

Dywedodd yr Arlywydd Volodymyr Zelensky fod yn rhaid i unrhyw atebion gynnwys Wcráin, gan ychwanegu ei fod yn barod i gydweithio at "heddwch parhaol".

Yn hwyr ddydd Sadwrn, dywedodd swyddog yn y Tŷ Gwyn y byddai Mr Trump yn fodlon trefnu cyfarfod gyda Mr Putin a Mr Zelensky - ond am y tro, dim ond y ddau ohonyn nhw sy'n parhau i gael eu cynnwys, fel y gofynnwyd yn wreiddiol gan arweinydd Rwsia.

Mae Donald Trump wedi awgrymu o'r blaen y gallai ddechrau trwy gyfarfod â Putin yn unig, gan ddweud ei fod yn bwriadu "dechrau gyda Rwsia".

Ond dywedodd Arlywydd yr Unol Daleithiau hefyd ei fod yn credu bod yna "gyfle" i drefnu cyfarfod ar gyfer y tri ohonyn nhw.

Nid yw'n glir a fyddai Putin yn cytuno i hyn ac mae wedi gwrthod sawl cyfle i gynnal sgyrsiau uniongyrchol gyda Zelensky.

'Ateb diplomyddol'

Wrth siarad ddydd Gwener, awgrymodd Trump hefyd y byddai "rhywfaint o gyfnewid tiriogaethau" er mwyn i Moscow a Kyiv ddod i gytundeb.

Mewn ymateb i'w sylwadau, dywedodd Zelensky ar Telegram: "Ni fyddwn yn gwobrwyo Rwsia am yr hyn y mae wedi'i chyflawni. 

"Mae unrhyw benderfyniadau yn ein herbyn, unrhyw benderfyniadau heb Wcráin, hefyd yn benderfyniadau yn erbyn heddwch."