Mae Cadeirydd Pwyllgor Gwaith Eisteddfod Genedlaethol 2026 wedi dweud bod cyfle i gynnig nawdd i "bobl falle sydd ddim yn gyfarwydd â'r Eisteddfod" er mwyn cyrraedd y targed arian.

Bob blwyddyn mae'r Eisteddfod yn gosod targed i Bwyllgor Gwaith y Brifwyl i godi £400,000 ar gyfer ei chynnal.

Y flwyddyn nesaf fe fydd yr Eisteddfod yn cael ei chynnal yn Sir Benfro, gyda dalgylch yr ŵyl yn cynnwys cymunedau yn ne Ceredigion a gorllewin Sir Gaerfyrddin sydd yn ffinio â Sir Benfro.

Wrth siarad â Newyddion S4C dywedodd Cadeirydd y Pwyllgor Gwaith, John Davies, bod yr ymgyrch codi arian yn gyfle i wahodd busnesau "bach a mawr" i noddi'r ŵyl hyd wythnos.

"Ma’ angen ffrindie newydd masnachol ar yr ŵyl," meddai.

"Mae hynny'n creu yr asgwrn cefn a’r dygnwch ariannol hynny sydd angen efo’r cynaliadwyaeth i unrhyw ŵyl o’r faint hyn pan y’ch chi’n ystyried fydd e’n costi peth nesa’ i £7 miliwn i’w rhoi ymlaen.

“Ac felly dwi’n credu ma’ ‘na gyfle a ddod o gefndir busnes y’n hunain a wedi bod yn ymwneud â’r Sioe Frenhinol am ddegawd, ma’ cyfle fydden i’n gweud i edrych yn wahanol i ddod â busnesau yn agosach ac fod y pecyn nawdd yn adlewyrchu haelioni y cwmnïau hynny.

"Ma' cyfle i edrych yn wahanol ar y cynnig o nawdd yn y cyd-destun yma, cwmnïau bach a mawr, ma' mor syml a hynny."

'Traddodiadol'

Erbyn diwedd yr wythnos mae Mr Davies yn disgwyl i Eisteddfod y Garreg Las godi dros £200,000, sydd dros hanner y targed ariannol.

Un o'r ffyrdd mae'r pwyllgor gwaith yn ceisio cyrraedd y nod ydy gwerthu tocynnau raffl £2 yr un gyda'r enillydd yn derbyn car trydan a gafodd ei roi fel rhodd.

Fe fydd dulliau traddodiadol o godi arian hefyd yn cael eu cynnal, meddai'r cadeirydd.

“Mae’n naturiol, y’ch chi’n cynnal gweithgarwch traddodiadol, yn y cymunedau, achos ma’ hwnna’n rhan o godi ymwybyddiaeth a dod â pobl yn agosach, ffrindie newydd i’r ŵyl, ma’ hwnna’n hollbwysig, ma’ angen neud hynny dro ar ôl dro.

“Erbyn diwedd yr wythnos hon fyddwn ni hanner ffordd yn y nod dwi ddim yn galw fe’n darged, nod yw e, fel ma’ ‘na nod hefyd i gynnal y diwylliant, i hyrwyddo’r iaith, ac i godi ymwybyddiaeth.

“So, y’n ni ar y ffordd ac y’n ni dros hanner ffordd.”