Mae sawl person, gan gynnwys merch 17 oed, wedi dioddef anafiadau difrifol mewn gwrthdrawiad ym Mangor nos Fawrth.

Cafodd yr heddlu eu galw i'r gwrthdrawiad, rhwng VW Golf gwyn a Vauxhall Corsa du, ar Ffordd Treborth ar yr A487 am 20:31.

Fe gafodd merch 17 oed ei chludo i Ysbyty Gwynedd, ond bellach mae wedi ei chludo gan ambiwlans awyr i ysbyty yn Stoke gydag anafiadau difrifol.

Mae pobl eraill oedd yn teithio yn yr un car wedi dioddef anafiadau difrifol ac yn derbyn triniaeth feddygol.

Cafodd gyrrwr y VW Golf, dyn 57 oed, ei arestio ar amheuaeth o yrru heb fod mewn cyflwr addas oherwydd diod neu gyffuriau ac achosi anafiadau difrifol trwy yrru'n beryglus.

Fe gafodd ei gludo i Ysbyty Gwynedd gyda man anafiadau.

Mae’r Rhingyll Duncan Logan o’r Uned Ymchwilio i Wrthdrawiadau Difrifol yn apelio am dystion.

“Mae ein hymchwiliad i sefydlu achos y gwrthdrawiad ar y gweill," meddai.

“Rwy’n annog unrhyw un a allai fod wedi gweld y gwrthdrawiad ac sydd heb siarad â ni eto i gamu ymlaen.

"Rwyf hefyd yn apelio i unrhyw un a allai fod â lluniau camera dashfwrdd yn dangos sut roedd y VW Golf gwyn yn cael ei yrru cyn y gwrthdrawiad, i gysylltu â ni cyn gynted â phosibl.”

Mae unrhyw un sydd â gwybodaeth gysylltu â Heddlu'r Gogledd drwy’r wefan neu drwy ffonio 101, gan ddyfynnu’r rhif cyfeirnod 25000787692.