Fe fydd 160 o golffwyr yn cystadlu yng nghystadleuaeth flynyddol yr Eisteddfod Genedlaethol ddydd Mercher.

Dyma’r 20fed tro i’r gystadleuaeth gael ei chynnal ers ei sefydlu yn Eisteddfod y Rhyl yn 1985.

Mae disgwyl i 160 o golffwyr brwdfrydig gymryd rhan yn y gystadleuaeth eleni.

Dywedodd y trefnwyr fod y gystadleuaeth wedi tyfu mewn poblogrwydd dros y blynyddoedd gyda'r chwaraewyr yn dechrau o 07.30 a'r seremoni wobrwyo'n digwydd wrth iddi nosi.

Mae'r gystadleuaeth yn cael ei chynnal yng Nghlwb Golff Wrecsam ar Ffordd Holt, wrth ymyl Maes yr Eisteddfod.

Dywedodd sylfaenydd y gystadleuaeth, Gwyndaf Evans o Grymych, Sir Benfro, fod y gystadleuaeth yn gyfle i ddod i adnabod ac i roi cynnig ar wahanol gyrsiau o amgylch Cymru mewn awyrgylch cyfeillgar a hwyliog.

“Fe wnaethom ddechrau yn 1985 pan gafodd yr Eisteddfod Genedlaethol ei chynnal yn y Rhyl ac roedd mor llwyddiannus nes i ni benderfynu cynnal un arall y flwyddyn ganlynol ac rydym wedi gwneud hynny bob blwyddyn heblaw pan gafodd yr Eisteddfod ei gohirio oherwydd pandemig Covid-19.”

Dywedodd Gwyndaf, 86 oed, sy’n cael ei adnabod yng nghylchoedd yr Eisteddfod fel Gwyndaf Golff, mai cystadleuaeth 'stableford' yw hi i ddynion a menywod gyda gwobrau i’r chwaraewyr gwrywaidd a benywaidd gorau.

Ychwanegodd Gwyndaf: “Rwyf wedi ennill y gystadleuaeth ddwywaith yn y gorffennol ac mae Huw Llewelyn Davies, y sylwebydd rygbi adnabyddus, hefyd wedi ennill ddwywaith. Rydym ill dau i fod i chwarae yn Wrecsam eleni.

“Ac wrth i’r Eisteddfod Genedlaethol gael ei chynnal yn Llantood, dim ond ychydig filltiroedd o Grymych y flwyddyn nesaf, rwy’n edrych ymlaen at gymryd rhan mewn cystadleuaeth ar dir fy nghartref.”