Mae cynllun wedi bod mewn grym ar gyfer unrhyw dywydd gwyntog meddai Prif Weithredwr yr Eisteddfod wrth i Storm Floris chwythu heibio ddydd Llun.

Roedd rywfaint o ôl y gwynt ar y Maes erbyn ganol bore, gyda ffensys o amgylch y toiledau a biniau wedi eu chwythu i lawr, ac roedd rhaid cynnal Seremoni’r Orsedd yn y Pafiliwn.

Mae rhybudd melyn yn ei le yn rhan helaeth o ogledd Cymru hyd at hanner nos ddydd Llun, ond nid yw’n berthnasol i ardal maes yr Eisteddfod.

Dywedodd Betsan Moses bod y “gwirio yn parhau” o ran y tywydd ond roeddynt wedi cael gwybod nos Sul y bydd “y storm ei hun yn bell ohonon ni”.

“Mae yna rywfaint o wyntoedd felly mae'r timoedd wedi bod allan ers 5:00 y bore ma yn sicrhau bod bob dim yn iawn,” meddai.

“Ond roedden ni’n iawn i agor am 08.00 ac mi fyddwn ni’n parhau drwy’r dydd i wirio.

“Mae gyda ni bolisi tywydd. Mae fel goleuadau traffig - mae’n mynd o wyrdd i oren i goch.

Dywedodd bod tîm yn mynd o amgylch y Maes i siarad gyda pherchnogion stondinau hefyd.

“Er enghraifft, os oes baner yn cael ei rhoi a dydi e ddim at ddefnydd allanol fe fyddwn ni’n atgoffa pobl, dydi e ddim yn briodol rhoi hwnna tu allan heddi,” meddai.

“Jesd er mwyn eu cynorthwyo nhw fel stondinwyr. Ond does dim angen mynd o wyrdd i oren ar hyn o bryd.”