Mae'r canwr opera a'r cyflwynydd Wynne Evans wedi cyhuddo rhaglen Strictly Come Dancing y BBC o fod yn "sylfaenol ddiffygiol yn ei ddyletswydd gofal".

Fe wnaeth y tenor o Gaerfyrddin gystadlu yng nghyfres pen-blwydd 20 mlynedd y rhaglen ddawnsio boblogaidd gyda'r ddawnswraig Katya Jones.

Ym mis Mai, cyhoeddodd Evans nad oedd y BBC am barhau i'w gyflogi ac na fyddai'n cyflwyno ei raglen ar BBC Radio Wales ar ôl ymddiheuro am wneud sylw "amhriodol ac annerbyniol" wrth lansio taith Strictly Come Dancing.

Daeth yr ymddiheuriad ar ôl i'r Mail On Sunday adrodd ym mis Ionawr ei fod wedi anelu jôc o natur rywiol at y ddawnswraig Janette Manrara.

Mewn neges ar Instagram gyda llun o weithwyr proffesiynol Strictly, dywedodd Evans: "Sut deimlad ydi gweld lluniau o Strictly?

"Fi fydd y cyntaf i gyfaddef fy mod i wedi gwneud camgymeriadau. Nid yn union fel byddai’r Daily Mail yn eich annog i gredu, ond camgymeriadau serch hynny."

Mae Evans wedi cyhuddo'r BBC o gymryd rhan mewn cyfres o "gelwyddau a chuddio er mwyn eu rhyddhau eu hunain o unrhyw gamwedd".

Ychwanegodd: "O’m trafodaethau ar y brig gyda Tim Davie [chyfarwyddwr cyffredinol y BBC], trwy BBC Cymru a’r adran adnoddau dynol, mae un teimlad wedi bod yn gyson: yr unig beth maen nhw wir yn poeni amdano yw amddiffyn eu hunain a’u swyddi a’u graddfeydd – mae pobl yn dod yn ail i hynny.

"Pan nes i gamu i mewn i’r ystafell ymarfer yn Strictly am y tro cyntaf, roeddwn i’n meddwl y byddai’n brofiad hudolus. Ac ar y dechrau, mi oedd o. 

"Ond y peth cyntaf a ddywedwyd wrtha i oedd: 'Peidiwch ag ymddiried yn unrhyw un yn yr ystafell hon – dim hyd yn oed fi.' 

"Fe wnaeth hynny fy nharo i'n galed iawn. Rydw i bob amser wedi dangos fy nheimladau yn agored ac er fy mod i'n agos iawn at groesi'r llinell weithiau, nid oes byth unrhyw falais yn yr hyn rwy’n ei wneud.

"Yr hyn nad oeddwn wedi paratoi ar ei gyfer oedd y ffordd y bydd pobl yn amddiffyn eu brandiau personol a brandiau’r BBC, a hynny ar unrhyw gost."

'System wedi torri'

Yn ei neges ar Instagram, fe wnaeth Evans honni fod adran adnoddau dynol y BBC wedi "gwyrdroi ffeithiau, dyfeisio ffeiliau a dyddiadau, a chreu fersiwn o ddigwyddiadau nad oedd yn wir o gwbl".

"Cyhoeddwyd datganiadau yn fy enw i nad oeddwn hyd yn oed wedi’u gweld, heb sôn am gytuno â nhw. Fe gafodd fy llais ei gymryd i ffwrdd," meddai.

Dywedodd Evans yn flaenorol nad oedd erioed wedi cymeradwyo’r datganiad a gyhoeddwyd gan y BBC ym mis Ionawr lle ymddiheurodd am wneud sylw "amhriodol ac annerbyniol".

Ar y pryd, dywedodd llefarydd ar ran y BBC: "Cafodd yr ymddiheuriad a gyhoeddwyd ar ran Wynne gan gynrychiolydd cysylltiadau cyhoeddus Taith Strictly Come Dancing ddydd Sadwrn 25 Ionawr ei gymeradwyo’n llawn gan Wynne."