Mae menyw wedi marw yn dilyn gwrthdrawiad ffordd yn Sir Gâr fore Mercher. 

Dywedodd Heddlu Dyfed-Powys eu bod wedi cael eu galw i wrthdrawiad rhwng dau gerbyd am 08:00 fore Mercher ar ffordd yr A40 rhwng Caerfyrddin a Llandeilo.

Roedd y gwrthdrawiad rhwng cerbyd Renault Clio coch a cherbyd Audi Q5 glas. 

Bu farw'r fenyw oedd yn gyrru'r Renault yn y fan a'r lle. 

Mae ei theulu agos wedi cael gwybod ac yn cael eu cefnogi gan swyddogion arbenigol. 

Fe gafodd y teithwyr yn y cerbyd arall eu cludo i'r ysbyty gydag anafiadau nad ydynt yn peryglu bywyd. 

Fe gafodd y ffordd ei chau ar gyfer ymholiadau cychwynnol ac mae bellach wedi ei hail-agor.