Mae dros hanner meysydd awyr y DU gan gynnwys Caerdydd wedi codi ffioedd ar gyfer gollwng teithwyr wrth ddrws blaen eu terfynfeydd dros y flwyddyn ddiwethaf yn ôl ymchwil newydd.

Doedd gan Faes Awyr Caerdydd ddim ffi o gwbl ond maen nhw bellach yn codi £3 am ollwng teithwyr wrth ddrws ffrynt eu terfynfa (terminal).

Roedd 11 o’r 20 maes awyr mwyaf yn y DU wedi codi ffioedd ar gyfer gollwng teithwyr wrth eu terfynfeydd dros y flwyddyn ddiwethaf meddai’r RAC.

Yn y cyfamser doedd dim ffi o gwbl am ollwng teithwyr wrth wyth o’r 10 maes awyr prysuraf yn yr Undeb Ewropeaidd, gan gynnwys Paris Charles de Gaulle, Frankfurt a Madrid .

Dywedodd uwch swyddog polisi’r RAC, Rod Dennis, ei fod wedi ei “ddigalonni” gan y cynnydd mewn ffioedd ym meysydd awyr y DU.

 “Mae’n ymddangos nad yw’r awyr yn unrhyw derfyn ar y prisiau y mae’n rhaid i yrwyr eu talu i adael ffrindiau neu anwyliaid y tu allan i faes awyr,” meddai.

'Osgoi tagfeydd'

Y naw maes awyr a gododd eu ffioedd £1 oedd Belfast, Birmingham, Bryste, Caeredin, Gatwick, Heathrow, John Lennon yn Lerpwl, Newcastle a Southampton.

Ychwanegodd Leeds Bradford a Glasgow 50c at eu ffioedd nhw.

Doedd gan Luton ddim ardal gollwng teithwyr yr haf diwethaf oherwydd tân mewn maes parcio, ond maen nhw bellach yn codi £5.

Dinas Llundain oedd yr unig faes awyr yn y DU a oedd yn ôl dadansoddiad yr RAC yn caniatáu gollwng teithwyr am ddim y tu allan i'w terfynfa.

Dywedodd Karen Dee, prif weithredwr y corff sy’n cynrychioli meysydd awyr AirportsUK, bod y ffioedd yn lleihau traffig.

“Mae gan bob maes awyr gyfleusterau gollwng teithwyr am ddim,” meddai, gan ychwanegu mai dewis “premiwm” oedd y gallu i ollwng teithwyr o flaen drws blaen terfynell.

“Lle codir ffioedd, mae hyn yn helpu meysydd awyr i reoli a lleihau tagfeydd, sŵn, allyriadau carbon a llygredd aer ar gyfer cymunedau lleol, rhywbeth y mae’r Llywodraeth ac awdurdodau lleol wedi’u gorchymyn iddyn nhw ei wneud.

“Mae’r ffioedd hyn yn rhan o fodel busnes y maes awyr ac yn helpu i alluogi darparu’r amrywiaeth ehangaf o hediadau o’r maes awyr.”