Bydd grantiau ar gyfer ceir trydan newydd yn cael eu hail gyflwyno, ar ôl i'r cynllun gael ei ddileu gan y llywodraeth Geidwadol flaenorol yn San Steffan ym Mehefin 2022.  

Mae Adran Drafnidiaeth y DU wedi cyhoeddi y bydd modd i yrwyr sicrhau hyd at £3,750 o ostyngiad, wrth brynu car trydan newydd.

Nod y llywodraeth Lafur yw annog mwy o yrwyr i gefnu ar gerbydau disel neu betrol a phrynu ceir trydan.

Bydd y grantiau ar gyfer cerbydau trydan sydd yn werth hyd at £37,000.

Yn ôl yr Adran Drafnidiaeth, mae 33 model newydd ar gael bellach sy'n werth llai na £30,000.

Mae Llywodraeth San Steffan wedi addo gwahardd gwerthiant ceir a faniau newydd disel neu betrol o 2030.

Dywedodd yr Ysgrifennydd Trafnidiaeth, Heidi Alexander: “Bydd y grant EV hwn, nid yn unig yn galluogi pobl i gadw mwy o'u harian yn eu pocedi, ond bydd hefyd yn cynorthwyo'r diwydiant moduro i elwa ar un o gyfleoedd mwyaf yr 21 ganrif. 

“A gyda mwy na 82,000 o safleoedd gwefru cyhoeddus bellach ar gael ar hyd a lled y Deyrnas Unedig, rydym wedi adeiladu'r isadeiledd sydd ei angen er mwyn i deuluoedd gael hyder i ddewis cerbydau trydan.”

Bydd y grantiau newydd yn cael eu hariannu drwy gynllun newydd gwerth £650 miliwn. 

Bydd y cerbydau sydd fwyaf llesol i'r amgylchedd ym mand un, gyda'u perchnogion yn medru hawlio grant hyd at £3,750.

Bydd perchnogion cerbydau sydd ym mand dau yn medru hawlio hyd at £1,500.

Yn ôl llefarydd y Ceidwadwyr ym maes trafnidiaeth, yr Aelod Seneddol Gareth Bacon, mae'r llywodraeth yn "gorfodi teuluoedd i droi at gerbydau trydan drytach, pan nad yw'r Deyrnas Unedig yn barod ar gyfer hynny.”

Ychwanegodd y bydd ail gyflwyno'r grantiau yn arwain at “fwy o boen i drethdalwyr.”