Mae perchnogion bwyty enwog yn Rhosili ar Benrhyn Gŵyr yn dweud bod eu calonnau wedi torri ar ôl i dân ddinistrio to'r adeilad dros nos.

Cafodd Gwasanaeth Tân ac Achub Gorllewin a Chanolbarth Cymru eu galw i westy a bwyty The Worm's Head, ychydig wedi canol nos.

Mae lluniau yn dangos y to wedi ei ddinistrio yn llwyr. 

Ni chafodd unrhyw un ei anafu.

Mewn datganiad ar y cyfryngau cymdeithasol dywedodd perchnogion y bwyty ei bod yn anodd amgyffred yr hyn sydd wedi digwydd.

"Nid ydym yn gwybod beth i'w ddweud na sut i brosesu pethau yn dilyn y tân nos Lun.

"Nid ydym ni'n gwybod sut y byddwn yn ail afael ynddi yn y dyfodol agos ond byddwn yn dychwelyd yn gryfach.

"Mae mor dorcalonnus i'n teulu gweld 25 mlynedd o waith caled yn cael ei ddinistrio mewn 30 munud.

"Rydym yn diolch i'r gwasanaeth tân a'r heddlu am ddod mor sydyn ac i Sarah a Chris o The View Rhosili am agor mor hwyr yn y nos a darparu cefnogaeth i ni."

Image

Mae'r bwyty a gwesty wedi ei leoli ger Bae Rhosili, gyda golygfeydd o'r traeth.

Dyw achos y tân ddim yn glir, ac mae'r heddlu'n ymchwilio.

Dywedodd llefarydd ar ran Gwasanaeth Tân ac Achub Gorllewin a Chanolbarth Cymru bod criwiau o orsafoedd Reynoldston, Gorllewin Abertawe, Port Talbot, Treforys, Canol Abertawe a Gorseinon wedi cael eu galw i'r gwesty.

"Wedi i'r tân gael ei ddifodd, bu'r criwiau yn monitro'r mannau a oedd yn dal yn dwym ... gyda'r criwiau olaf yn gadael am 09:32.

"Mae'r adeilad wedi cael ei ddifrodi'n sylweddol," meddai'r llefarydd.