Mae Heddlu'r Gogledd yn apelio am wybodaeth yn dilyn ymosodiad yn y Rhyl, sydd wedi gadael dyn gydag anafiadau difrifol.

Digwyddodd yr ymosodiad ger siop bwcis William Hill ar Ffordd Wellington yn oriau mân bore dydd Sadwrn.

Ychydig cyn 00.30, aeth swyddogion a chriwiau ambiwlans i'r lleoliad yn dilyn adroddiadau bod dyn wedi dioddef anafiadau difrifol i'w ben.

Cafodd y dioddefwr 40 oed ei gludo i Ysbyty Stoke ac mae'n parhau mewn cyflwr difrifol iawn.

Dywedodd y Ditectif Arolygydd Richard Evans: "Rwy'n apelio ar unrhyw un a oedd yn yr ardal ar y pryd ac a allai fod wedi gweld y digwyddiad hwn i ddod ymlaen.

"Hoffwn hefyd ofyn i unrhyw un a oedd yn gyrru yng nghanol y dref ar yr adeg hon wirio unrhyw luniau camera dashcam sydd ganddynt.

"Ar hyn o bryd mae swyddogion yn gwneud ymholiadau yn ardal y Rhyl a bydd trigolion yn gweld mwy o bresenoldeb heddlu wrth i'r ymchwiliad hwn fynd yn ei flaen."

Mae modd rhannu gwybodaeth a allai gynorthwyo'r ymchwiliad drwy ffonio 101, gan ddyfynnu'r cyfeirnod C104697.