Mae aelod o Glwb Rygbi Cymry Caerdydd wedi cwblhau her seiclo er mwyn codi arian ar gyfer meinciau i gofio cyn chwaraewyr "sydd ddim gyda ni bellach".

Penderfynodd Neil Cole o Gastell-nedd seiclo'r 122 milltir o gartref y clwb ar gaeau Pontcanna i Gei Newydd yng Ngheredigion.

Mae wedi codi £2,500 ac yn gobeithio gallu codi dwy fainc ger y caeau er mwyn cofio am gyn-chwaraewyr oedd yn ffrindiau agos iddo.

"Mae'n gyfle i ni godi arian ar gyfer meinciau i rai sydd ddim gyda ni bellach," meddai.

"Rhai oedd yn ffrindiau agos iawn i mi yn ystod fy nghyfnod gyda'r clwb.

"Gallwn ni eistedd ar y meinciau, gwylio'r gemau a chofio'r rhai sydd ddim gyda ni bellach gyda chwrw bach.

"Dwi wedi bod trwy uffern ar y beic, un o'r dyddiau anoddaf erioed.

"Ond mae hyn i gyd ar gyfer achos da."

Image

Dechreuodd Neil y daith o gaeau Pontcanna, ac fe deithiodd i Gei Newydd mewn dau ddiwrnod.

Seiclodd i gartref ei rieni yng Nghastell-nedd ar y diwrnod cyntaf, cyn cwblhau'r daith ar yr ail ddiwrnod.

Disgrifiodd Eurof James, cadeirydd Clwb Rygbi Cymry Caerdydd Neil Cole fel "arwr" sydd wedi gwasanaethu llawer dros y clwb ar hyd y blynyddoedd.

“Syniad Neil oedd o. Ma’n arwr y clwb ac wedi bod wrthi am bron i 40 mlynedd erbyn hyn," meddai.

“Dyma daith beic olaf Neil dros y clwb. Ond mae’n gwneud gymaint o waith dros y clwb gyda’r menywod, yr ieuenctid a rheolwr yr ail dîm felly mae cael rhywun fel'na yn y clwb yn ddiolch yn anhygoel.

“Mae’n un o is-gadeiryddion y clwb ac yn amlwg wedi colli ffrind agos yn ddiweddar oedd arfer chwarae i’r clwb.

“Byddai cael mainc tu ôl i’r cae lawr yn Pontcanna yn gyfle i bobl hel meddyliau, rhannu atgofion a chael sgwrs am bob dim.

“Ma' Neil wedi casglu cymaint o arian yn enw clwb dros y blynyddoedd a oedd hwn yn her bersonol roedd o isho neud."

Image

'Teulu mawr'

Ychwanegodd Eurof y bydd y clwb yn trafod gyda'r cyngor i gael y meinciau yn eu lle, a bod englynion am gael eu gosod arnynt hefyd.

“Mae ein cyn-chwaraewr Dafydd Emyr wedi sgwennu englyn neu ddwy i goffhau’r holl bobl sydd wedi gwisgo crys y clwb dros y blynyddoedd a chadw enw da y clwb wrth i ni fynd o nerth i nerth.

“Fel clwb ‘da ni’n gymuned sy’n dod a pobl at ei gilydd ar draws Cymru. O Bwllheli o Ben Llŷn, o Llandeilo o’r canolbarth i’r gogledd ac o bedwar ban y byd o dweud y gwir.

“Mae’n un teulu mawr o ddynion a menywod sy’n chwarae i’r clwb a hefyd 500 o blant sydd yn chwarae erbyn hyn.

“Felly ma' cael rhyw ganolbwynt i ddathlu’r holl ddynion a menywod sydd wedi chwarae i’r clwb yn gyfle da i’w cofio."