Bydd golwr Cymru Danny Ward yn colli'r gêm yn erbyn Kazakhstan ar ôl dioddef anaf i'w ben ddydd Sadwrn.

Dioddefodd Ward gyfergyd yn ystod buddugoliaeth Wrecsam yn erbyn Millwall.

Roedd y golwr 33 oed wedi glanio'n lletchwith ar ôl brwydro i ennill y bêl yn yr awyr yn ystod amser ychwanegol ar ddiwedd y gêm.

Derbyniodd driniaeth ar y cae cyn gorfod gadael y maes ar stretsier a derbyn ocsigen trwy fwgwd.

Dywedodd rheolwr Wrecsam, Phil Parkinson bod Ward yn anymwybodol ac wedi dioddef anaf i'w benelin. Cafodd ei gludo i'r ysbyty.

"Dyw e ddim yn edrych yn addawol pan chi'n gweld chwaraewr yn gadael y cae fel'na," meddai.

"Yr unig beth allwn ni ei wneud yw croesi ein bysedd.

"Ond mae meddyg y clwb wedi dweud wrtha i fod pethau ddim yn edrych yn dda, felly pan mae'r meddyg yn dweud hynny chi'n ofni'r gwaethaf.

"Dwi'n meddwl bod y cyfergyd ar ei ben ei hunain mynd i olygu bydd Danny ddim yn chwarae am gyfnod."

Ward yw un o dri golwr sydd wedi eu dewis yng ngharfan Cymru i wynebu Kazakhstan yn Astana ar 4 Medi, cyn wynebu Canada mewn gêm gyfeillgar yn Abertawe ar 9 Medi.

Karl Darlow o Leeds United ac Adam Davies o Sheffield United sydd hefyd yn y garfan.

Ond Ward yw'r unig golwr sydd yn chwarae'n gyson i'w glwb, gyda'r ddau arall yn eistedd ar y fainc.

Mae Cymru yn ail yn eu grŵp rhagbrofol ar hyn o bryd, gyda Gogledd Macedonia ar y brig a Gwlad Belg yn y trydydd safle.