Mae disgwyl i'r Senedd basio cyfraith newydd a fydd yn rhoi'r grym i gynghorau sir allu codi treth ar bobl sy'n aros dros nos yng Nghymru.

Byddai'n golygu y byddai'n rhaid i ymwelwyr dalu £1.30 + TAW am bob noson maen nhw'n aros mewn gwestai, gwely a brecwast a llety hunanarlwyo.

Byddai ymwelwyr sy'n aros mewn hosteli neu feysydd gwersylla yng Nghymru yn talu swm is o 75c + TAW bob noson.

Ni fyddai'n rhaid i bobl o dan 18 oed sy'n aros mewn hosteli a meysydd gwersylla yn y wlad dalu'r dreth.

Mae Llywodraeth Cymru yn amcangyfrif y byddai'r dreth yn codi hyd at £33 miliwn y flwyddyn, a hynny er mwyn cefnogi'r diwydiant twristiaeth.

Mae'n debygol y bydd y gyfraith yn cael ei phasio ddydd Mawrth, gan fod Plaid Cymru yn cefnogi cynllun Llafur Cymru.

Er y byddai'r gyfraith yn rhoi'r grym i awdurdodau lleol godi'r dreth eu hunain, nid yw'n ofynnol iddyn nhw wneud hynny, gan roi'r dewis i bob cyngor yn unigol.

Byddai gan y cynghorau hefyd y gallu i adolygu'r gyfradd ar ôl blwyddyn, yn amodol ar gytundeb â Llywodraeth Cymru.

Os yw'r cynlluniau'n cael eu cymeradwyo, byddai'r dreth yn cael ei chyflwyno o 2027 ar y cynharaf.

Y bwriad, meddai Llywodraeth Cymru, yw mynd i'r afael ag effaith twristiaeth ar rai o'r cymunedau yng Nghymru.

Cynghorau lleol fyddai'n penderfynu sut i wario'r arian sy'n cael ei godi drwy'r dreth.

Dadleuol

Er hynny, mae pryderon y gallai'r cynlluniau effeithio ar nifer y bobl sy'n ymweld â'r wlad.

Mae'r Ceidwadwyr eisoes wedi honni y byddai'r cynlluniau yn arwain at lai o bobl yn aros mewn gwestai.

Ond fe wnaeth Ysgrifennydd Cymru, Jo Stevens wfftio honiadau o'r fath ym mis Rhagfyr.

"Mae dros 40 o wledydd ac ardaloedd o gwmpas y byd wedi cyflwyno ryw fath o dreth ymwelwyr, gan gynnwys Groeg, Amsterdam, Barcelona, a California, ac mae llawer ohonan ni wedi talu'r dreth heb hyd yn oed sylweddoli," meddai.

"Bydd yr arian yn helpu i gynnal diwydiant twristiaeth tymor hir hyfyw yng Nghymru. Rwy'n hyderus y bydd Llywodraeth Cymru'n cydweithio gyda busnesau a thwristiaeth i gael hwn yn iawn."

Llun: Tim Johnson