Mam yn gwadu taro'i phlentyn a fu farw o anaf i'w ben
Mae mam i fachgen dwy oed a fu farw ar ôl dioddef anaf i'w ben wedi gwadu taro'r plentyn.
Roedd Ethan Ives-Griffiths o dan ei bwysau am blentyn o'i oed, gyda 40 o anafiadau ar ei gorff, pan gwympodd yng nghartref ei nain a'i daid yn Sir y Fflint ar 14 Awst, 2021.
Yn Llys y Goron yr Wyddgrug mae ei nain a'i daid, Michael Ives, 47 oed, a Kerry Ives, 46 oed, yn gwadu llofruddio'r bachgen, a fu farw yn yr ysbyty ddau ddiwrnod yn ddiweddarach, ac mae ei fam Shannon Ives, 28 oed, yn gwadu achosi neu ganiatáu ei farwolaeth.
Wrth roi tystiolaeth ddydd Llun, roedd Shannon Ives yn emosiynol pan ofynnwyd iddi gan David Elias KC, a oedd yn amddiffyn ei thad, a oedd hi erioed wedi taro Ethan.
Dywedodd: "Naill ai tap ar y llaw neu dap ar y pen-ôl, dyna oedd y cyfan."
Heddlu
Gofynnwyd iddi pam nad oedd wedi sôn ei bod wedi gweld ei thad yn ysgwyd Ethan y diwrnod pan ddisgynnodd nes iddi gael ei chyfweld gan yr heddlu bron i flwyddyn yn ddiweddarach.
Dywedodd: “Cefais wybod am yr hyn a ddywedodd y meddygon yn eu hadroddiadau.”
Mae'r rheithgor wedi clywed tystiolaeth feddygol bod anaf angheuol Ethan wedi'i achosi gan ddefnydd bwriadol o rym, a allai fod wedi cynnwys elfen o ysgwyd yn rymus, ac wedi digwydd o fewn munudau i'w gwymp.
Dywedodd Mr Elias: “Oeddech chi'n ceisio beio pwy bynnag y gallech chi ac nid chi'ch hun?”
Atebodd: “Na, oherwydd nad oeddwn i erioed wedi'i ysgwyd.”
Dywedodd Mr Elias: “Rydych chi'n ffugio'r ysgwyd yn gyfan gwbl?”
Atebodd Ives: “Na, dydw i ddim.”
Pan ofynnwyd pam y cymerodd flwyddyn iddi ddweud wrth yr heddlu, dywedodd: “Roedd fy mhen yn llanast, roedd fy mab wedi marw.”
Dywedodd Mr Elias: “Chi oedd yr un a darodd Ethan, ie ddim?”
Dywedodd Ives: “Na, wnes i ddim.”
Mae Michael a Kerry Ives, o Ffordd Kingsley, Garden City, yn gwadu llofruddiaeth, un cyhuddiad o achosi neu ganiatáu marwolaeth plentyn a chreulondeb i berson dan 16 oed.
Mae Shannon Ives, o Rhes-y-Cae, ger Treffynnon, yn gwadu achosi neu ganiatáu marwolaeth plentyn a chreulondeb i berson dan 16 oed.
Mae'r achos yn parhau.
