Mae tri dyn wedi eu harestio ar ôl i heddweision gael eu hanafu mewn protest tu allan i westy lle mae ceiswyr lloches yn aros yn Epping, yn ne ddwyrain Lloegr.

Digwyddodd y brotest tu allan i Westy'r Bell nos Wener wedi i gwmni Somani Hotels, sy'n berchen ar y gwesty, a'r Swyddfa Gartref herio dyfarniad yr Uchel Lys a fyddai wedi atal 138 o geiswyr lloches rhag cael llety yno y tu hwnt i 12 Medi.

Cafodd y gorchymyn cyfreithiol dros dro, a oedd fod i rwystro ceiswyr lloches rhag cael llety yn y gwesty, ei wrthdroi yn y Llys Apêl.

Dywedodd Heddlu Essex bod un dyn wedi cael ei arestio ar amheuaeth o anhrefn treisgar, un dyn wedi arestio ar amheuaeth o ymosod ar heddwas a thrydydd dyn wedi arestio ar amheuaeth o yfed a gyrru ar ôl i gar gael ei yrru ar ochr anghywir y ffordd tuag at cordon heddlu.

Mae'r tri yn parhau yn y ddalfa, meddai'r llu.

Roedd gan sawl un o'r protestwyr baneri Lloegr a Jac yr Undeb.

Dywedodd y Prif Gwnstabl Cynorthwyol Glen Pavelin: "Mae protestio yn hawl ddemocrataidd, a byddwn yn gwneud pob dim o fewn ein gallu i ganiatáu hynny, i bob grŵp sydd eisiau lleisio barn.

"Roedd y rhan fwyaf o bobl yn Epping nos Wener eisiau lleisio eu barn ac roeddynt wedi gwneud hynny mewn ffordd ddiogel nad oedd angen ymateb yr heddlu.

"Fodd bynnag, mae'r hawl i brotest ddim yn cynnwys hawl i droseddu a nos Wener roedd rhai wedi cael eu harestio.

"Dioddefodd ddau heddwas anafiadau, sydd ddim yn ddifrifol diolch byth."

Daeth The Bell yn ganolbwynt i sawl protest a gwrth-brotest yn ystod yr wythnosau diwethaf ar ôl i geisiwr lloches a oedd yno gael ei gyhuddo o ymosod yn rhywiol ar ferch yn ei harddegau fis diwethaf.

Mae Hadush Gerberslasie Kebatu wedi gwadu'r drosedd ac mae ei achos llys wedi cychwyn yr wythnos hon.