Bydd ffermwyr yng Nghymru yn gallu allforio cynnyrch cig i'r Undeb Ewropeaidd yn sgil cytundebau masnach diweddar gyda UDA, India a'r UE yn ôl Syr Keir Starmer. 

Bydd cyfarfod Cyngor y Gwledydd a’r Rhanbarthau yn cael ei gynnal yn Llundain ddydd Gwener, gan ddod ag arweinwyr gwleidyddol Cymru, Yr Alban, Gogledd Iwerddon, Lloegr a meiri rhanbarthol Lloegr ynghyd. 

Dyma'r ail dro i'r cyfarfod gael ei gynnal, ers iddo gael ei sefydlu gan y Llywodraeth Lafur. 

Ychwanegodd Syr Keir Starmer y bydd cytundebau masnach gyda UDA, India a'r UE yn "gwella bywoliaethau" ar draws y DU. 

Fe fydd y "cytundebau masnach yn sicrhau diogelwch tymor-hir" i bobl yn ôl Syr Keir. 

“Byddant yn creu cyfleoedd ar gyfer masnach fwy di-dor ac yn denu buddsoddiad mewnol i dyfu’r economi, gan wneud gwahaniaeth i fywydau pobl," ychwanegodd.

Nid pawb sydd yn fodlon gyda chytundeb diweddar y llywodraeth gyda'r UE, gyda Reform UK a'r Ceidwadwyr yn dadlau ei fod yn tanseilio pleidlais Brexit ac yn peryglu dyfodol y diwydiant pysgota.

Dywedodd y Prif Weinidog fod cytundeb a gafwyd mewn uwchgynhadledd yn Llundain ddydd Llun yn fuddugoliaeth i’r ddwy ochr, ac yn ddechrau “cyfnod newydd” yn y berthynas rhwng y DU a’r UE.

Bydd y cytundeb yn caniatáu i fwy o deithwyr o Brydain ddefnyddio e-giatiau pasbort wrth fynd ar wyliau i Ewrop, tra bydd ffermwyr yn cael mynediad cyflymach a haws i fasnachu ar y cyfandir o ganlyniad i gytundeb ar safonau cynnyrch anifeiliaid a phlanhigion.

Daw'r cytundeb wedi cytundeb masnach gydag India a fydd yn ei gwneud hi'n haws i gwmnïau o'r DU i allforio wisgi, ceir a chynnyrch eraill i'r wlad, yn ogystal â thorri trethi ar allforion dillad ac esgidiau India.

Mae Llywodraeth y DU hefyd wedi sicrhau cytundeb gydag Arlywydd UDA Donald Trump i leihau tariffau ar rai nwyddau sy'n cael eu masnachu rhwng y gwledydd.