Mae tîm dynion Everton wedi chwarae eu gêm olaf ym Mharc Goodison ddydd Sul. 

Mae'r stadiwm wedi bod yn gartref i'r tîm dynion ers 133 o flynyddoedd. 

Enillodd Everton yn erbyn Southampton o 2-0 brynhawn Sul. 

O'r tymor nesaf, fe fydd tîm David Moyes yn chwarae mewn stadiwm newydd sy'n dal 52,888 o bobl yn Noc Bramley-Moore ar lannau Afon Mersi.

Mae'r clwb wedi cyhoeddi y bydd tîm y menywod yn chwarae ym Mharc Goodison y tymor nesaf. 

Wrth siarad cyn y gêm, dywedodd rheolwr tîm y dynion David Moyes: "Dwi'n meddwl fod pob Evertonian wedi bod yn aros fwy neu lai am y foment yma am amser hir, oherwydd yr edrych ymlaen at y stadiwm newydd. 

"Fe fydd yn ddiwrnod trist, dwi'n meddwl y bydd yn ddiwrnod emosiynol i nifer o bobl."

Dychwelodd Moyes i'r clwb ym mis Ionawr, wedi iddo hefyd fod yn rheolwr yno rhwng 2002 a 2013.

Ychwanegodd y bydd yn fraint iddo fod yn rheolwr ar y tîm yn eu gêm olaf yn Goodison.