Mae cwest i farwolaeth dyn 92 oed o Wynedd wedi clywed ei fod wedi marw o oerfel ar ôl mynd yn sownd mewn mwd mewn cae.

Roedd William Morris Jones o ardal Cricieth wedi bod yn cerdded ar hyd llwybr oedd yn gyfarwydd iddo ger ei gartref yn Rhoslan ar ôl y Nadolig y llynedd.

Ond clywodd cwest i'w farwolaeth yng Nghaernarfon ddydd Llun bod y cae yn "gorsiog iawn" a'i fod mewn mwd at ei bengliniau.

Cafodd ei gorff ei ddarganfod gan yr heddlu ar 29 Rhagfyr y llynedd yn dilyn cyfnod o chwilio amdano.

Roedd wedi bod yng Nghaernarfon y diwrnod cynt cyn dychwelyd ar y bws i ardal Cricieth.

Roedd tyst wedi ei weld yn cerdded heibio Mynydd Ednyfed i gyfeiriad ei gartref yn Rhoslan.

Yn dilyn hynny fe wnaeth yr heddlu chwilio yn y cae, gan ddod ar draws bag siopa ac ymbarél. 

Dywedodd PC Adam Hall, a ddaeth o hyd i gorff Mr Jones: "Roedd yn anodd iawn cerdded drwy’r cae oherwydd y mwd dwfn corsiog. 

"Gallai fod wedi mynd i drafferthion wrth geisio gerdded drwy’r cae."

Dywedodd y patholegydd Dr Muhammad Zain Mehdi fod yna fwd ar ei wyneb, ei freichiau a'i ddwylo. 

"Mae’n debygol iddo aros allan yn yr oerfel dros nos," meddai.

Roedd hi'n dair gradd y noson honno. 

"Mae'n debygol y byddai hyn yn achosi hypothermia," ychwanegodd.   

Dywedodd Nora Roberts fod ei chefnder yn arfer bod yn ofalwr tir mewn clwb golff lleol ac yn "greadur o arfer" oedd yn mynd i siopa yng Nghaernarfon.