Mae Clwb Pêl-droed Leeds United wedi rhyddhau datganiad mewn ymateb i lun o fab y Cymro Ethan Ampadu mewn crys clwb Galatasaray yn Nhwrci yn cael ei rannu ar gyfryngau cymdeithasol.

Ampadu yw capten Leeds. Cafodd dau o gefnogwyr y clwb, Kevin Speight a Christopher Loftus, eu trywanu i farwolaeth yn Istanbul yn 2000 cyn gêm rhwng Leeds a Galatasaray.

Mewn datganiad, dywedodd Leeds nad oedd gan Ampadu gyfrifoldeb am gyhoeddi'r llun na'i gynnwys.

Dywedodd datganiad y clwb ddydd Gwener: "Mae Leeds United yn ymwybodol o ddelwedd ar-lein o fab Ethan Ampadu.

"Gwahanodd Ethan oddi wrth ei bartner sawl mis yn ôl ac nid oes ganddo unrhyw gyfrifoldeb am y ddelwedd dan sylw. 

"Mae Ethan yn ymwybodol ac yn sensitif i'r golled drasig o fewn teuluoedd Loftus a Speight. Mae’r clwb yn gofyn i breifatrwydd Ethan gael ei barchu mewn cyfnod anodd iddo ef yn bersonol. 

"Mae ein capten wedi bod yn arweinydd ar ac oddi ar y cae y tymor hwn, gan ddangos ei ymrwymiad i’r clwb, ei hanes, a chymuned ehangach Leeds. 

"Mae gan Ethan gefnogaeth lawn pawb yn Leeds United. Ni fydd y clwb yn gwneud unrhyw sylw pellach."