Bydd £9m yn cael ei fuddsoddi dros y ddwy flynedd nesaf gyda’r nod o stopio trosglwyddiadau newydd o HIV yng Nghymru.

Bydd £4m o’r arian yn ehangu gwasanaeth profi ar-lein cyfrinachol am ddim ar gyfer yr haint.

Mae'r gwasanaeth profi ar-lein eisoes yn darparu 40,000 o brofion HIV gartref bob blwyddyn meddai Llywodraeth Cymru. Mae bron i 16,000 o becynnau profi cymunedol yn cael eu dosbarthu ledled Cymru hefyd.

Dywedodd yr Ysgrifennydd Iechyd, Jeremy Miles ei fod “eisiau i bobl sy'n byw gyda HIV yng Nghymru fyw eu bywydau gorau posibl”.

"Byddwn ni'n codi ymwybyddiaeth o bwysigrwydd profi ac yn ehangu ein gwasanaethau profi ar-lein llwyddiannus, gan ei gwneud hi'n haws i bobl gael mynediad at brawf,” meddai.

“Byddwn ni hefyd yn ei gwneud hi'n haws i bobl gael mynediad at PrEP ac yn atgyfnerthu'r neges allweddol na all pobl sydd ar driniaeth effeithiol drosglwyddo HIV i eraill."

Mae'r cyffur broffylacsis cyn-gysylltiad (PrEP), o'i gymryd yn unol â presgripsiwn, yn lleihau'r risg o ddal HIV ryw 99%.

Mae Cymru eisoes yn darparu PrEP drwy'r GIG. Bellach, bydd math amgen o'r cyffur ar gael fel mater o drefn i'r rhai nad ydynt yn gallu cymryd y math presennol.

“Byddwn yn cryfhau gwasanaethau cymorth i sicrhau bod pobl sydd â HIV yn byw'n dda ac yn cael y driniaeth gywir pan fydd ei hangen arnynt,” meddai Llywodraeth Cymru.