Mae rhybudd melyn am stormydd mewn grym ar gyfer Cymru gyfan brynhawn ddydd Llun. 

Mae’r rhybudd mewn grym rhwng 12:00 a 22:00 ac yn dilyn cyfnod o dywydd braf.

Yn ôl y Swyddfa Dywydd gallai'r tywydd stormus arwain at oedi i deithiau yn ogystal ag achosi llifogydd mewn mannau.

Maen nhw hefyd wedi rhybuddio y gallai rhai ardaloedd golli cyflenwadau pŵer am gyfnod. 

Mae disgwyl i’r cawodydd a stormydd symud yn gyflyn yn ystod y prynhawn.

Gallai hyd at 30mm o law syrthio o fewn awr, gyda hyd at 50mm yn cwympo o fewn dwy awr.

Fe allai mellt daro’n aml mewn rhai ardaloedd yn ystod y prynhawn, gyda phosibilrwydd o genllysg hefyd. 

Fe fydd y  glaw a stormydd yn ysgafnhau tuag at nos Lun.

Fe fydd y rhybudd melyn yn effeithio ar bob sir yng Nghymru.