Mae Undeb Rygbi Cymru (URC) wedi penodi Dave Reddin yn Gyfarwyddwr Rygbi Proffesiynol.

Cafodd Mr Reddin ei benodi i'r swydd ddydd Gwener, bedwar mis ers i Nigel Walker adael ei swydd fel Cyfarwyddwr Rygbi Gweithredol Cymru.

“Rydw i wrth fy modd ac yn teimlo’n anrhydeddus o gael ymuno â rygbi Cymru ar adeg mor allweddol yn hanes cyfoethog y gêm yma,” meddai Reddin. 

“Dyma un o’r swyddi mwyaf yn y byd rygbi oherwydd yr angerdd a’r ystyr sydd i’r gêm yng Nghymru. 

“Mae heriau amlwg ond rydw i wedi ysbrydoli gan y potensial gwirioneddol sydd yn y weledigaeth a’r strategaeth newydd y mae [y prif withredwr] Abi Tierney. a’i thîm wedi’u cyfleu."

Yn y gorffennol mae Dave Reddin wedi gweithio i Gymdeithas Bêl-droed Lloegr, tîm rygbi dynion Lloegr a Team GB.

Roedd yn arbenigwr ffitrwydd i dîm rygbi dynion Lloegr rhwng 1997 a 2006, cyfnod lle enillodd y wlad Gwpan Rygbi'r Byd.

Yn ystod Gemau Olympaidd 2012 roedd yn gyfarwyddwr gwasanaethau perfformiad Team GB, cyn gadael i ymuno â Chymdeithas Bêl-droed Lloegr.

Yn y swydd honno roedd yn gyfrifol am feddyginiaethau perfformiad, dadansoddiad, perfformiad corfforol a datblygiad.

Roedd wedi gweithio gyda'r garfan yn ystod Cwpan y Byd Rwsia yn 2018.

Un o'i brif gyfrifoldebau gyda URC fydd ceisio denu prif hyfforddwr newydd i'r tîm cenedlaethol yn dilyn ymadawiad Warren Gatland yn ystod y Chwe Gwlad.

Colli pob un gêm oedd hanes Cymru yn y Chwe Gwlad eleni, gan olygu nad ydyn nhw wedi ennill 17 o'u gemau rhyngwladol diwethaf.

Llun: Asiantaeth Huw Evans