Mae'r cyfryngau yn yr Eidal wedi cyhoeddi enwau'r cwpl o Brydain a gafodd eu lladd mewn damwain car cebl yn y wlad.

Roedd Elaine Margaret Winn, 58, a Graeme Derek Winn, 65, o Sir Gaerlŷr ymhlith y pedwar a fu farw yn y ddamwain ar gyrion dinas Naples.

Fe wnaeth y cerbyd, a oedd yn cysylltu tref Castellamare di Stabia â chopa mynydd Faito, blymio i'r ddaear brynhawn dydd Iau.

Y gred yw bod weiren y car cebl wedi torri 20 eiliad cyn iddyn nhw gyrraedd y copa.

Dywedodd perchnogion y car cebl ei fod wedi pasio archwiliad diogelwch bythefnos yn ôl a bod ymchwiliad troseddol wedi ei agor.

Mae'r Swyddfa Dramor wedi dweud eu bod mewn cysylltiad ag awdurdodau lleol - ond nid ydyn nhw wedi cadarnhau enwau'r dioddefwyr.

'Colled fawr'

Dywedodd llefarydd ar ran Academi Welland Park fod Ms Winn yn gweithio yn yr ysgol fel rheolwr busnes ac y "bydd ei cholled yn cael ei deimlo'n fawr".

"Roedd Elaine yn aelod hoffus ac uchel ei pharch o gymuned ein hysgol," meddai'r llefarydd.

"Fe wnaeth ei phroffesiynoldeb, ei chynhesrwydd, a’i hymroddiad diwyro i fywyd ysgol gyffwrdd â bywydau myfyrwyr, staff, a theuluoedd."

Ychwanegodd: "Mae'r gofal a'r caredigrwydd a ddangosodd i bawb yn ein cymuned yn golygu y bydd ei cholled yn cael ei deimlo'n fawr gennym ni i gyd."

Image

Bu farw hefyd Carmine Parlato, 59 oed, a dynes o Israel o'r enw Janan Suliman.

Cafodd pumed person, brawd Ms Suliman, ei "anafu’n ddifrifol iawn" yn y ddamwain a’i gludo i’r ysbyty, lle mae’n parhau mewn cyflwr difrifol.

Roedd yn rhaid i 16 o bobl mewn car cebl arall gael eu hachub yn dilyn y digwyddiad, gyda’r car cebl yn sownd ar y weiren ger troed y mynydd.

Mae car cebl Mount Faito wedi bod yn gweithredu ers 1952. 

Bu farw pedwar o bobl mewn damwain debyg ar y weiren ym 1960.