Mae cynllwyniwr bom Arena Manceinion, Hashem Abedi, wedi ymosod ar dri swyddog carchar gydag olew coginio poeth, meddai Cymdeithas y Swyddogion Carchar (POA).

Fe wnaeth Abedi daflu olew coginio poeth dros y swyddogion ddydd Sadwrn cyn gwneud arfau a’u trywanu, meddai POA, undeb llafur sy’n gwasanaethu staff carchardai.

Dywedodd yr undeb ddydd Sul fod y swyddogion a gafodd eu trywanu bellach mewn cyflwr sefydlog.

Yr Heddlu Gwrthderfysgaeth (CTP) yng ngogledd ddwyrain Lloegr fydd yn arwain yr ymchwiliad i’r “ymosodiad difrifol”.

Dioddefodd y swyddogion anafiadau a oedd yn peryglu bywyd gan gynnwys llosgiadau, sgaldiadau a chlwyfau trywanu yn yr ymosodiad “dieflig”, meddai’r POA.

Fe gadarnhaodd y Gwasanaeth Carchardai fod tri swyddog carchar wedi cael triniaeth yn yr ysbyty ar ôl ymosodiad gan garcharor ynng ngharchar Frankland, Swydd Durham.

Cafodd un swyddog benywaidd ei rhyddhau erbyn 16:00 ddydd Sadwrn.

Dywedodd CTP nos Sadwrn fod gan y ddau sy'n dal yn yr ysbyty anafiadau difrifol.

Cafodd Abedi ei garcharu am oes am gynorthwyo ei frawd Salman Abedi a laddodd ei hun a 22 o bobl trwy ffrwydro bom mewn sachell mewn torf wrth fynd i gyngerdd.

Dywedodd uwch gydlynydd cenedlaethol dros dro CTP, y Comander Dom Murphy: “Mae hwn yn ymchwiliad parhaus sydd yn ei gamau cynnar, ac rydym yn gweithio’n galed i sefydlu’r ffeithiau. Felly, ni allwn wneud sylw pellach ar hyn o bryd.”

Llun: PA