Mae prif hyfforddwr Cymru wedi dweud bod tîm y menywod yn “barod i herio” eu gwrthwynebwyr yn Ffrainc ddydd Sadwrn ar ôl “dysgu gwersi” yn dilyn eu colled yn erbyn Lloegr. 

Fe gollodd Cymru o 12-67 yn erbyn Lloegr yn Stadiwm Principality yng Nghaerdydd yn eu gêm ddiwethaf. 

Ond mae Sean Lynn yn dweud eu bod wedi dysgu gwersi hollbwysig all fod o gymorth yn ystod eu gêm yn erbyn Ffrainc yn Stade Amédée-Domenech yn Brive. 

“Fe wnaethon nhw (Lloegr) fynd â ni y tu hwnt i’r hyn ‘da ni’n gyfforddus gyda - ac fe ‘nath hynny wneud i mi sylweddoli bod yn rhaid i mi wneud yr un peth gyda’r chwaraewyr yn ystod sesiynau hyfforddi,” meddai Lynn. 

“Da ni wedi bod yn ceisio hyfforddi yn ddwys… Y nod yw sicrhau ein bod yn gwella ym mhob gêm. 

“Da ni’n gwybod ein bod ni’n gallu gwneud yn well… a ‘da ni’n benderfynol o brofi hyn yn erbyn tîm Ffrengig o’r safon uchaf. 

“Mae'n rhaid i ni herio ein hunain,” ychwanegodd. 

'Popeth i'w ennill'

Nod y crysau cochion ddydd Sadwrn fydd rhoi Ffrainc “dan bwysau,” esboniodd Lynn. 

Dyma fyddai'r tro cyntaf i Gymru ennill yn erbyn Ffrainc ers 2016 pe bai’r cochion yn fuddugol. 

Roedd capten Cymru, Hannah Jones yn rhan o’r tîm buddugol yn erbyn Ffrainc ar y pryd, gan ddweud bod ei thîm yn ceisio gwneud “gwelliannau bach” cyn y gêm. 

“Unwaith eto, sgynnon ni ddim byd i’w colli a phopeth i’w ennill,” meddai. 

“Os allwn ni ddechrau a pharhau fel nathon ni yn ystod y 10 munud gyntaf yn erbyn Lloegr efallai neith y dorf troi.” 

Ni fydd maswr Cymru Lleucu George yn rhan o’r tîm i herio Ffrainc yn dilyn anaf i’w phigwrn. Mae hyn yn golygu y bydd y canolwr Kayleigh Powell yn cymryd ei lle. 

Fe fydd Courtney Keight yn gadael y fainc hefyd gan ymuno gyda Hannah Jones yng nghanol cae. 

Dyma’r tîm llawn fydd yn wynebu Ffrainc yn Stade Amédée-Domenech: 

15 Jasmine Joyce, 14 Lisa Neumann, 13 Hannah Jones (C), Courtney Keight, 11 Carys Cox, 10 Kayleigh Powell, 9 Keira Bevan, 1 Gwenllian Pyrs, 2 Carys Phillips, 3 Jenni Scoble, 4 Abbie Fleming, 5 Gwen Crabb, 6 Kate Williams, 7 Bethan Lewis, 8 Georgia Evans. 

Eilyddion: 

16 Kelsey Jones, 17 Maisie Davies, 18 Donna Rose, 19 Natalia John, 20 Alaw Pyrs, 21 Bryonie King, 22 Sian Jones, 22 Nel Metcalfe.