Mae cynllun dadleuol ar gyfer adeiladu canolfan ymwelwyr ar Foel Famau yn Sir Ddinbych wedi ei gymeradwyo.

Redd Cyngor Sir Dinbych wedi gwneud cais i’w swyddfa gynllunio ei hun i gael codi'r adeilad.

Bydd yr adeilad yn cael ei godi ychydig dros filltir o gopa uchaf Bryniau Clwyd ac ar safle maes parcio Pen Barras.

Mae'r maes parcio yn fan cychwyn i nifer o gerddwyr i frig y bryn 554m o uchder.

Bydd y ganolfan yn cynnwys toiledau, caffi, canolfan dwristiaeth a swyddfeydd.

Moel Famau yw pwynt uchaf Ardal o Harddwch Naturiol Eithriadol Bryniau Clwyd a Dyffryn Dyfrdwy.

Mae tua 300,000 o bobl yn cyrraedd y copa bob blwyddyn, a nod y ganolfan fydd i helpu i gwrdd â’r “heriau” sy’n dod wrth i nifer yr ymwelwyr gynyddu.

Cynllun dadleuol

Roedd y cyngor wedi derbyn degau o lythyrau yn gwrthwynebu'r cynllun gan godi pryderon am ragor o ymwelwyr, traffig, bywyd gwyllt a’r effaith ar yr Ardal o Harddwch Naturiol Eithriadol.

Dywedodd un gwrthwynebydd nad oedd “caffis a mynyddoedd yn gymysg da fel mae profiad Eryri wedi ei ddangos”.

“Bydd maes parcio llawn ymwelwyr yn defnyddio’r caffi heb unrhyw lefydd ar ôl i bobl sydd eisiau cerdded,” medden nhw.

Ond roedd nifer o blaid y cynllun yn dadlau bod angen cyfleusterau yn yr ardal ac yn rhagweld budd economaidd.

Nid oedd unrhyw wrthwynebiad wedi dod gan gydbwyllgor ymgynghorol Ardal o Harddwch Naturiol Eithriadol Bryniau Clwyd a Dyffryn Dyfrdwy.

“Mae’r cydbwyllgor yn parhau i gefnogi’r cynnig hwn ar y sail y bydd yn gwasanaethu’r niferoedd presennol o ymwelwyr yn y lleoliad hwn ac yn disodli’r cyfleusterau dros dro sydd ar gael,” meddai'r pwyllgor cyn y penderfyniad.

Cafodd y cais ei gymeradwyo ddydd Mercher yn Neuadd y Sir yn Rhuthun.