Mae tri lleoliad oddi ar arfordir Cymru yn cael eu hystyried ar gyfer prosiect ffermydd gwynt sydd yn arnofio.

Mae Ystâd y Goron wedi cadarnhau eu bod nhw wedi cyrraedd camau olaf y broses o ddewis lleoliadau ffermydd gwynt yn Y Môr Celtaidd.

Yr Ystâd sydd yn rheoli gwely’r môr o amgylch Cymru, Lloegr a Gogledd Iwerddon.

Maent hefyd wedi penderfynu ar y cwmnïoedd sydd ar y rhestr fer ar gyfer adeiladu'r ffermydd gwynt.  

Fe allai'r datblygiad greu miloedd o swyddi meddai Ystâd y Goron. 

Mae porthladdoedd Aberdaugleddau, Abertawe a Phort Talbot yn cael eu hystyried gan y cwmnïau sydd wedi bod yn llwyddiannus wrth wneud ymgais i'w hadeiladu.

Yn ogystal mae pedwar porthladd yn ne orllewin Lloegr a gogledd Ffrainc hefyd yn cael eu hystyried.

Y bwriad yn y pendraw yw creu tair fferm wynt. 

Yn ôl Ystâd y Goron, mae'r wybodaeth sydd wedi'i ddarparu gan y cwmnïoedd sy'n ymgeisio yn dangos "posibilrwydd cryf" y gallai safleoedd ym Mhort Talbot a Bryste gael eu dewis.

Dywedodd Ysgrifennydd Gwlad Cymru, Jo Stevens bod y cyfle yn un "euraidd" i Gymru.

“Mae’r cyhoeddiad heddiw yn dangos bod Cymru’n barod i achub ar y cyfle euraidd o wynt arnofiol yn y Môr Celtaidd, a sicrhau mwy na 5,000 o swyddi a biliynau o bunnoedd o fuddsoddiad y gallai hyn ei ddwyn i’r rhanbarth.

 “Bydd Cymru yn chwarae rhan allweddol mewn darparu pŵer glân fel rhan o'n Cynllun ar gyfer Newid, gan hybu twf economaidd, gostwng biliau ynni a rhoi mwy o bunnoedd ym mhocedi pobl ledled Cymru."

'Sefyllfa dda'

Yn ôl y cynlluniau, byddai'r ffermydd gwynt newydd yn creu dros 5,000 o swyddi yn ogystal â hwb gwerth £1.4 biliwn i'r economi.

Bydd y tyrbinau gwynt yn mesur 300m mewn taldra, sydd yr un mor uchel â'r Shard yn Llundain.

Fe fyddan nhw yn cael eu gosod ar blatfformau sydd tua'r un maint â chae pêl-droed.

Dywedodd llefarydd ar ran Ystâd y Goron eu bod nhw wedi bod yn gweithio gyda Llywodraeth Cymru a Llywodraeth y DU wrth gynllunio a gweithio ar y prosiect hwn.

Dywedodd Rebecca Evans, Ysgrifennydd Economi, Ynni a Chynllunio Llywodraeth Cymru: “Mae ein porthladdoedd mewn sefyllfa dda i gefnogi’r diwydiant hwn sydd yn tyfu, ac rydym wedi ymrwymo i sicrhau bod datblygiadau o’r fath yn darparu buddion economaidd parhaol i Gymru tra'n parhau i gryfhau ein sefyllfa fel arweinydd ynni adnewyddadwy."

Ar hyn o bryd mae gan Gymru dair fferm wynt oddi ar yr arfordir yn y gogledd sef Gwynt y Môr, Gwastadeddau'r Rhyl a North Hoyle.