Roedd y Democratiaid Rhyddfrydol yn fuddugol mewn is-etholiad yn un o gadarnleoedd y Blaid Lafur.

Enillodd cynrychiolydd y blaid, Susan Grounds, is-etholiad Cwmllynfell ac Ystalyfera yng Nghastell-nedd Port Talbot.

Allan o'r 1,126 o bleidleisiau, roedd y Democratiaid Rhyddfrydol wedi hawlio 383 ohonynt, sef 34% o'r bleidlais.

Plaid Cymru oedd yn ail agos gyda 340 pleidlais.

Reform cipiodd y drydydd safle gyda 150 o bleidleisiau, tra bod Llafur yn y bedwerydd safle gyda 143.

Dywedodd David Chadwick, Aelod Seneddol Y Democratiaid Rhyddfrydol dros Aberhonddu, Maesyfed a Chwm Tawe bod y blaid yn ennill yng Nghymru eto.

“Mae hon yn fuddugoliaeth wych i Ddemocratiaid Rhyddfrydol Cymru yn un o gadarnleoedd Llafur," meddai.

"Mae pobl yn gweiddi am newid ac wedi cael llond bol ar y diffyg cynnydd a dirywiad dan Lafur.

“Mae’r Democratiaid Rhyddfrydol yn ennill ledled Cymru eto ac rydym yma yn profi y gallwn herio’r status quo."

Mae'r canlyniad yn golygu bod gan Y Democratiaid Rhyddfrydol Cymreig dri chynghorydd ar Gyngor Castell-nedd Port Talbot a'u cyntaf yng Nghwm Tawe.

Daw'r canlyniad yn syndod gan fod yr ardal yn un o gadarnleoedd y Blaid Lafur.

Mae pob un Aelod Seneddol San Steffan sydd wedi ei ethol yng Nghastell-nedd ers 1922 wedi bod yn AS Llafur.

Ond wedi newidiadau i etholaethau'r llynedd, fe ddaeth Ystalyfera a Chwm Tawe dan etholaeth Aberhonddu, Maesyfed a Chwm Tawe.

Enillodd David Chadwick o'r Democratiaid Rhyddfrydol yn yr etholaeth newydd honno yn etholiad y DU'r llynedd.

Nid yw Llafur erioed wedi colli eu sedd yn yr etholaeth erioed yn etholiadau'r Senedd.