Agor cwest dau ddyn ifanc o Wrecsam fu farw mewn gwrthdrawiad
Owen Aaran Jones (chwith) ac Adam Watkiss-Thomas (dde)
Fe gafodd cwest ei agor ddydd Llun i farwolaethau dau ddyn ifanc yn eu harddegau mewn gwrthdrawiad beic modur yn hwyr y nos ym Mrychdyn Newydd, Wrecsam.
Dywedodd y crwner Kate Robertson bod Owen Jones, 19 oed, o Ridley View, Wrecsam, wedi cael anafiadau i'w frest a'i wddf, yn ôl patholegydd.
Cafodd Adam Watkiss-Thomas, 18, o Glos y Gweundir, Gwersyllt, anafiadau i'w frest a'i ben.
Fe fuodd y ddau farw ar Ffordd Wrecsam, Brychdyn Newydd, ar Fawrth 22.
Dywedodd y crwner yn Rhuthun fod yr heddlu wedi cael gwybod gan y gwasanaeth ambiwlans am wrthdrawiad beic modur a bod dau ddyn yn anymwybodol.
Cafodd y cwest ei ohirio er mwyn cynnal ymchwiliadau pellach.
Mae teyrngedau wedi'u rhoi i'r ddau gan eu teuluoedd.
Mewn teyrnged iddo, dywedodd teulu Owen ei fod yn “llanc poblogaidd” oedd â “gwên a allai oleuo ystafell”.
“Roedd ei ffrindiau a’i deulu yn adnabod Owen fel y person mwyaf doniol a chariadus iddyn nhw ei gyfarfod erioed.
“Bydd colli Owen fel mab, brawd, tad a ffrind yn gadael twll yn ein calonnau i gyd.
“Roedd yn fachgen poblogaidd a gafodd effaith ar bawb y cyfarfu â nhw.
“Ni allai unrhyw eiriau ddisgrifio’r boen o golli Owen.”
'Gwagle enfawr'
Dywedodd teulu Adam Watkiss-Thomas fod eu colled wedi gadael “gwagle enfawr yn ein calonnau”.
"Daeth i'r byd ar 1 Mai 2006 yn y fath frys. Fe'n gadawodd ni hefyd ar frys, gan wneud yr hyn yr oedd yn ei garu fwyaf.
“Mae’n gadael ei efaill ar ei ôl, sef ei ffrind gorau yn y byd ac roedd y brawd gorau i’w frawd a’i chwaer iau.
“Roedden ni i gyd yn ei garu gymaint a bydd yn gadael gwagle enfawr yn ein calonnau.
“Roedd ganddo'r galon fwyaf a gwnaeth yn siŵr ei fod yn gofalu am ei frodyr a chwiorydd.
“Byddwn ni i gyd yn gweld ei eisiau yn fawr, roedd yn fachgen poblogaidd iawn ac roedd ganddo lawer o ffrindiau oedd yn ei garu."
