Mae dros 1,600 o bobl wedi marw a bron i 3,500 wedi'u hanafu ar ôl i ddaeargryn nerthol daro Myanmar yn y dwyrain pell meddai llywodraeth filwrol y wlad.

Fe wnaeth y daeargryn, oedd yn mesur 7.7 ar y raddfa Richter, daro Myanmar fore Gwener.

Mae cryniadau'r daeargryn wedi effeithio ar wledydd cyfagos hefyd, gan gynnwys prifddinas Bankgkok yng Ngwlad Thai.

Roedd canolbwynt y daeargryn ger dinas Monywa ym Myanmar.

Dywedodd llywodraeth filwrol Myanmar ei bod wedi agor ysbyty dros dro ym Maes Awyr Mandalay.

Nid yw'r maes awyr yn weithredol ar hyn o bryd, gyda'r rhedfeydd wedi'u difrodi yn ystod y daeargryn.

Ond dywedodd llefarydd eu bod yn gweithio'n galed i ailddechrau hediadau.

Image

Mae Prif Weinidiog Myanmar, Min Aung Hlaing, wedi gwneud apêl am gymorth fyd-eang.

"Hoffwn wahodd unrhyw wlad, unrhyw sefydliad, neu unrhyw un ym Myanmar i ddod i helpu. Diolch," meddai.

Mae'r Unol Daleithiau, yr Undeb Ewropeaidd, Asean a China wedi addo rhoi cefnogaeth.

Yn ôl awdurdodau Gwlad Thai, mae o leiaf 10 o bobl wedi marw yn ei phrifddinas lle mae 17 miliwn o bobl yn byw, nifer mewn tyrau uchel.

Y gred yw bod mwy na 100 o bobl ar goll ar ôl i dwr ddymchwel yng nghanol y ddinas.

Mae Meysydd Awyr Gwlad Thai wedi cyhoeddi datganiad yn dweud bod chwech o’u meysydd awyr wedi dychwelyd i gynnig gwasanaethau arferol, gan gynnwys yn Bangkok, Chiang Mai, Hat Yai, Chiang Rai a Phuket.

Yn Myanmar, mae stad o argyfwng yn ardaloedd Sagaing, Mandalay, Magway, Bago, Talaith Dwyrain Shan a Naypyidaw yn ôl adroddiadau lleol.

Llun: Sai Aung / AFP