Mae llys wedi clywed bod dyn o sir Conwy wedi dwyn £5,000 gwerth o barseli tra roedd yn gweithio i gwmni Yodel. 

Plediodd Kevin O’Callaghan, 55 oed o Stryd Llewelyn, Penmachno yn euog i  ddwyn parseli oedd yn cynnwys ffonau symudol, tabledi a watshys clyfar. 

Cafodd ei ddedfrydu i wyth wythnos o garchar wedi’i ohirio am flwyddyn. 

Bydd yn rhaid iddo dderbyn cymorth i'w helpu rhoi’r gorau i ddefnyddio cyffuriau, a cafodd orchymyn i dalu £239 mewn costau. 

Dywedodd y barnwr rhanbarth Rhys Williams wrtho ei fod wedi dwyn “sawl eitem werthfawr dros gyfnod hirdymor.” 

Dywedodd cyfreithiwr Mr O’Callaghan, Huw Roberts, bod diwedd perthynas wedi’i “daro’n galed” yn ddiweddar. 

“Dydi o ddim yn gallu egluro ei ymddygiad mewn gwirionedd… roedd yn foment o wallgofrwydd aeth o ddrwg i waeth."” 

Dywedodd yr erlynydd Rebecca Ross fod swyddogion diogelwch o gwmni parseli Yodel wedi dechrau monitro Mr O’Callaghan ar ôl i barseli fynd ar goll.

Llun: Mtaylor848/Wikipedia