Mae’r Canghellor Rachel Reeves wedi diystyru polisïau “trethu a gwario” cyn datganiad y gwanwyn yr wythnos nesaf.

Er mwyn cwrdd â’r rheolau ariannol a osododd yn y gyllideb ym mis Hydref, mae Rachel Reeves dan bwysau i gynyddu trethi neu dorri gwariant oherwydd benthyca uwch na’r disgwyl.

Dangosodd ffigyrau a gafodd eu rhyddhau ddydd Gwener bod benthyca’r llywodraeth wedi cynyddu’n sylweddol ac yn llawer uwch na rhagolygon mis Chwefror.

Dywedodd Reeves na fyddai’n codi trethi na chwaith faint oedd y llywodraeth yn ei wario mewn cyfweliad â’r BBC.

“Allwn ni ddim trethu a gwario ein ffordd i safonau byw uwch a gwasanaethau cyhoeddus gwell. Dyw hynny ddim ar gael yn y byd rydyn ni’n byw ynddo heddiw,” meddai.

Pan fydd yn cyflwyno ei datganiad gwanwyn ddydd Mercher, bydd Reeves yn ymateb i ragolygon newydd gan y Swyddfa Cyfrifoldeb Cyllidebol a gafodd eu gwneud ar ôl i Fanc Lloegr leihau ei ragolygon ar gyfer twf eleni.

Roedd benthyca’r sector gyhoeddus yn £10.7 biliwn ym mis Chwefror, £4.2 biliwn yn fwy nag a gafodd ei ragweld gan yr OBR.

Mae cyn-ysgrifennydd gwaith a phensiynau Llafur, yr Arglwydd Blunkett, wedi annog y Canghellor i lacio ei rheolau cyllidol.

“Hoffwn i’r Canghellor lacio ychydig o’r rheolau cyllidol hunanosodedig, dyma uniongrededd y Trysorlys ac ariangarwch ar ei waethaf,” meddai wrth raglen The Week in Westminster ar BBC Radio 4.