Mae dyn wedi cael ei arestio ar ôl i ddwy ddynes gael eu taro gan gar yn Sir Ddinbych. 

Cafodd y ddwy eu cludo i’r ysbyty wedi iddyn nhw ddioddef anafiadau difrifol yn dilyn y digwyddiad ym Mhrestatyn. 

Fe wnaeth gyrrwr Mercedes C Class daro’r menywod ar Ffordd Yr Orsaf ger Ffordd Bastion am tua 18.30 nos Iau. 

Mae dyn 39 oed wedi cael ei arestio ar amheuaeth o achosi anafiadau difrifol drwy yrru’n beryglus. 

Mae’n parhau yn y ddalfa. 

Dywedodd Heddlu’r Gogledd eu bod nhw’n apelio am lygad dystion neu unrhyw un all fod o gymorth gyda’u hymchwiliad. 

Dywedodd y Ditectif Uwch Arolygydd Tim Evans o dîm arbenigol gwrthdrawiadau’r ffordd y gallai gwybodaeth gan bobl a welodd y gwrthdrawiad fod yn “hynod o bwysig.” 

“Rwyf hefyd yn apelio ar unrhyw un sydd â delweddau CCTV, dash-cam neu ddelweddau o gloch drws… i gysylltu ar unwaith.” 

Dywedodd y dylai pobl gysylltu drwy ddyfynnu’r cyfeirnod O003881.