Mae ymgyrch godi arian wedi ei lansio i dalu am waith i adnewyddu plas hanesyddol Glynllifon yng Ngwynedd.

Mae cwmni er budd cymunedol wedi ei sefydlu medd trefnwyr yr ymgyrch godi arian, er mwyn "ymgymryd â'r dasg enfawr o ddod â bywyd yn ôl i Blas Glynllifon".

Nid yw enw'r cwmni wedi ei rannu ar yr apêl gofundme, ond Martina Jones sydd yn gyfrifol am sefydlu'r apêl.

Y gobaith yw codi £1 miliwn drwy dderbyn cyfraniadau gan y cyhoedd.

Ers cael ei sefydlu ar 3 Mawrth mae'r apêl wedi codi £20 hyd yma.

Mae cyfrif newydd wedi ymddangos hefyd ar blatfform fideos TikTok o'r enw 'Plas Glynllifon Restoration'.

Mae Plas Glynllifon wedi bod yn nwylo nifer o ddatblygwyr sydd wedi ceisio adfywio'r adeilad sylweddol dros y blynyddoedd.

Fel rhan o'r datganiad sydd yn gofyn am arian adnewyddu ar gofundme, dywed y trefnwyr: "Mae'r 20 mlynedd diwethaf wedi ei weld yn mynd trwy ddwylo datblygwyr gwahanol, heb yr un yn llwyddo i'w roi ar waith. 

"Mae wedi cael ei adael yn wag a heb ei gyffwrdd am y dair blynedd diwethaf ac mae wedi mynd â'i ben iddo yn ofnadwy.

"Rydym yn bwriadu rhoi bywyd yn ôl i'r adeilad, a rhoi'r TLC y mae'n ei haeddu iddo, gan weithio’n agos gyda’r cyngor lleol, swyddogion cadwraeth a gweithwyr proffesiynol sy’n adnewyddu adeiladau hanesyddol a fydd yn ein helpu i ddod â’r plasty yn ôl i’w hen ogoniant."

Ychwanegodd y datganiad: "Gwahodd pobl i mewn i gerdded o amgylch yr ystafelloedd niferus a defnyddio'r gofodau sydd ganddo i'w cynnig ar gyfer gwahanol grwpiau cymunedol, celf, dawns, cerddoriaeth ac ati. 

"Marchnadoedd crefftwyr a gwneuthurwyr lleol a stiwdios a siopau artistiaid ar y safle.

"Bydd gennym ystafelloedd i'w gosod ar sail gwesty a mannau priodas/digwyddiad ar gyfer yr adeilad hwn er mwyn gallu talu amdano'i hun.

"Dewch i ni i gyd ddod at ein gilydd a gwneud hwn yr adeilad y mae'n haeddu bod, y gall pawb ei fwynhau!"

Llun: Wikipedia/'Chris'