Mae teulu dau berson a fu farw yn dilyn gwrthdrawiad ym Mhowys yn gynharach y mis hwn wedi rhoi teyrnged iddyn nhw. 

Bu farw tri o bobl wedi gwrthdrawiad ar ffordd yr A489 rhwng Yr Ystog a Lydham ar 11 Rhagfyr. 

Mae teyrngedau bellach wedi eu rhoi i ddyn a menyw, David a Pamela, oedd yn teithio yn y car gyda’i gilydd. 

“Roedd David a Pamela yn aelodau cariadus o’m teulu,” meddai’r datganiad. 

“Roedd y ddau ohonynt yn arbennig iawn i bob un ohonom. 

“Fe wnaeth David a Pamela symud i’r ardal yn gynharach y flwyddyn hon er mwyn mwynhau eu hymddeoliad. 

“Hoffwn ddiolch i bawb am eu cefnogaeth yn ystod y cyfnod erchyll hwn. Mae wedi golygu gymaint i’r teulu cyfan. 

“Hoffwn nawr gael amser i alaru ac rydym yn gofyn am breifatrwydd er mwyn gallu gwneud hynny.” 

Cafodd Heddlu Dyfed-Powys wybod am wrthdrawiad rhwng cerbyd Audi llwyd a Toyota Yaris coch ar ffordd yr A489 am 16.50, ddydd Iau 11 Rhagfyr. 

Bu farw dau o bobl oedd yn teithio yn y Toyota Yaris, a gyrrwr yr Audi. 

Mae’r llu yn parhau i annog unrhyw un all fod o gymorth gyda’u hymchwiliad, gan gynnwys unrhyw un gyda delweddau dash-cam, i gysylltu â nhw.