Mae Cwmni Theatr Maldwyn yn 40 oed.

Y Mab Darogan ddechreuodd y cyfan yn Eisteddfod Genedlaethol Machynlleth 1981 - drama gerdd am hanes Owain Glyndŵr.

Yn y brif ran, Penri Roberts a sefydlodd Gwmni Theatr Maldwyn gyda Linda Gittins a’r diweddar Derec Williams.

"Fuon ni'n trafod sawl testun cyn i ni ddod i'r penderfyniad gan mae ym Machynlleth oedd yr Eisteddfod Genedlaethol yn mynd i fod mai Owain Glyndŵr ddylai'r testun fod", meddai Penri Roberts wrth Newyddion S4C.

"Oedd criw o bobl hollol ddibrofiad, o ran ni'n tri yn sgwennu, ag o ran y cast i hunain.

"Hel pobl o bob rhan o'r sir a thu allan i'r sir yn Meirion, Ceredigion, gan ddod a chast o ryw 80 o bobl at ei gilydd a dechrau ymarfer y sioe ar gyfer yr Eisteddfod".

Er eu bod yn gwneud am y tro cyntaf erioed, roedd yr ymateb i gynhyrchiad y triawd yn rhyfeddol.

Image

'Rhywbeth ffantastig'

Roedd Barri Jones yn y cynhyrchiad cyntaf - ac mae wedi bod ym mhob un ers hynny.

"O'n i wedi gwirioni", meddai.

"Y sioe, y caneuon, ond y cwmni hefyd, y cyfeillgarwch oedd hi'n rhywbeth ffantastig.

"'Na i byth anghofio diwedd y sioe, oedd pawb ar eu traed. Ond odd 'na rai hyd yn oed yn sefyll ar eu cadeiriau ac wedi gwirioni yn amlwg".

Dros y degawdau a thrwy gymaint o berfformiadau ar draws Cymru, mae’r cwmni wedi dod a dwsinau o gyplau at ei gilydd.

Fe wnaeth Irfon a Sian Davies gwrdd am y tro cyntaf wrth ymarfer ar gyfer y sioe Pum Diwrnod o Ryddid.

"O'n i ddim yn mynd i ganu i ddechrau, o'n i jyst yn mynd i helpu efo props a phethe, ac wedyn yn sydyn reit o'n i'n y corws", meddai Irfon.

"Mwynhau'r gwmnïaeth a mwynhau dysgu'r caneuon, a chwrdd ag Irfon, a 'da ni di bod yn briod 28 o flynyddoedd sy'n anhygoel", ychwanegodd Sian.

"Ma' gennym ni ddau o blant, a'r mab ieuengaf Huw wedi bod yn aelod o Ysgol Theatr Maldwyn, a ma' 'na nifer o gyplau yn gallu ailadrodd yr un hanes".

I nodi'r pen-blwydd ma' 'na lyfr newydd  am hanes y cwmni wedi' gyhoeddi - Prydlondeb a Ffyddlondeb.

Llun: S4C