Cymru yn boethach na Corfu ac Ibiza ddydd Iau?
Gyda'r gwanwyn yn cyrraedd, gallai Cymru fod yn boethach na Corfu ac Ibiza ddydd Iau, yn ôl rhagolygon y Swyddfa Dywydd.
Erbyn y prynhawn, ar 20 Mawrth, y darogan ydy y bydd y tymheredd wedi codi yn y rhan fwyaf o Gymru i 18 gradd selsiws.
Mae hynny ryw saith gradd yn gynhesach na'r cyfartaledd ar gyfer yr adeg hon o'r flwyddyn.
Mae'n bosibl felly y bydd hi'n gynhesach yng Nghymru nag Ibiza, Sbaen sydd i fod yn 17 gradd selsiws, a Corfu, Gwlad Groeg sydd i fod i gyrraedd 16 gradd selsiws ar ei uchaf.
Dywedodd Becky Mitchell o'r Swyddfa Dywydd: “Ry'n ni'n disgwyl tipyn o dywydd sych, a digonedd o gyfnodau heulog yn yr ychydig ddyddiau nesaf, a gallai'r tymheredd gyrraedd 19 gradd selsiws ar ei uchaf yn y Deyrnas Unedig ddydd Iau."
Mae disgwyl iddi ddechrau cynhesu ddydd Mercher.
Ond cyn hynny, ddechrau'r wythnos, fe fydd hi'n ddigon oer, gyda rhew dros nos mewn mannau.
