Ar ôl ymddangos o flaen ynadon ddydd Sadwrn, mae pedwar o bobl wedi eu cadw yn y ddalfa ar gyhuddiad o lofruddio dynes a gafodd ei saethu'n farw yn Nhonysguboriau, Rhondda Cynon Taf, nos Sul, 9 Mawrth.
Mae Marcus Huntley, 20 oed o Laneirwg, Caerdydd; Melissa Quailey-Dashper, 39 oed o Gaerlŷr; Joshua Gordon, 27 oed o Oadby, Sir Gaerlŷr; a Tony Porter, 68 oed o Braunstone Town, Sir Gaerlŷr, wedi eu cyhuddo o lofruddio Joanne Penney.
Mae Tony Porter hefyd wedi ei gyhuddo o gymryd rhan mewn gweithgareddau oddi mewn i grŵp troseddol.
Mae dynes arall, Kristina Ginova, 21 oed o Oadby, Sir Gaerlŷr wedi ei chyhuddo o gynorthwyo troseddwr.
Cafodd cais am fechnïaeth ar ei rhan ei wrthod.
Ymddangosodd y pum diffynydd yn Llys Ynadon Caerdydd, a byddan nhw yn ymddangos yn Llys y Goron y brifddinas ar 18 Mawrth.
Cyhoeddodd Heddlu De Cymru fore Sadwrn fod person arall wedi ei arestio yn rhan o'u hymchwiliad, sef dyn 32 oed.
Cafodd ei arestio yn ardal Suffolk nos Wener.
Bu farw Joanne Penney a oedd yn 40 oed, ar ôl iddi gael ei saethu yn ei brest mewn tŷ yn ardal Llys Illtyd yn Nhonysguboriau.
Aeth y gwasanaethau brys i'r lleoliad nos Sul a darganfod Ms Penney gydag anafiadau difrifol.
Mae dyn 42 oed o Donysguboriau a gafodd ei arestio ddydd Sul, wedi ei ryddhau yn ddigyhuddiad, ond mae e ar fechnïaeth wrth i ymchwiliad gaei ei gynnal i honiadau o ymosod yn ei erbyn, medd y llu.
Mae Heddlu'r De yn bwrw golwg ar sawl ffactor, yn cynnwys y posibilrwydd y gallai Joanne Penney fod wedi ei chamgymryd am rywun arall.
Apêl
Dywedoddd y Ditectif Brif Uwch-arolygydd Ceri Hughes sy'n arwain yr ymchwiliad: " Mae ein tîm yn dal i geisio darganfod yr holl amgylchiadau arweiniodd at farwolaeth drasig Joanne.
"Rwy'n annog unrhyw un sydd â gwybodaeth am ei marwolaeth, neu be ddigwyddodd yn y cartref yn Llys Illtyd nos Sul, i wneud y peth iawn a chysylltu â ni. Gallai'r darn lleiaf o wybodaeth fod yn allweddol bwysig," meddai.
Brynhawn Gwener, cyhoeddodd ei theulu ddatganiad yn rhoi teyrnged iddi: “Rydym wedi ein syfrdanu gan golled drasig ein hannwyl Joanne. Roedd hi'n ferch, mam, chwaer, a nith – roedd hi’n cael ei charu gan bawb oedd yn ei hadnabod.
"Ni wnawn fyth anghofio ei charedigrwydd, ei chryfder, a'i chariad at ei theulu.
“Yn ystod y cyfnod hynod anodd hwn, rydym yn gofyn am breifatrwydd wrth i ni alaru.
"Gwerthfawrogwn gefnogaeth a chydymdeimlad y gymuned a gofynnwn yn garedig i’n teulu gael lle i alaru mewn heddwch.
“Byddem yn ddiolchgar pe gallai unrhyw un sydd â gwybodaeth rannu hyn gyda thîm ymchwilio’r heddlu.
“Diolch am barchu ein dymuniadau.”
