Mae cyn-lywodraethwr Banc Lloegr Mark Carney wedi dweud na fydd Canada “byth” yn rhan o America ar ôl ennill y ras i olynu Justin Trudeau fel Prif Weinidog y wlad.

Bydd Mark Carney, sy’n 59 oed, a fu’n bennaeth banc canolog Prydain rhwng 2013 a 2020, yn cymryd lle Justin Trudeau fel Prif Weinidog ar ôl iddo ennill y ras i arwain y Blaid Ryddfrydol.

Cyhoeddodd Trudeau ei fod yn ymddiswyddo fis Ionawr ar ôl bod yn Brif Weinidog ers 2015, wedi galwadau i roi’r gorau iddi gan ei ASau ei hun.

Ar hyn o bryd, Carney yw cadeirydd y cwmni buddsoddi amgen o Ganada, Brookfield Asset Management.

Bydd yn rhaid iddo nawr benderfynu pryd i alw etholiad cyffredinol yng Nghanada – a fydd yn rhaid ei gynnal cyn 20 Hydref 2025.

Yn 2013, ef oedd y person cyntaf i redeg Banc Lloegr ers ei sefydlu ym 1694 nad oedd yn ddinesydd Prydeinig.

Arweiniodd hefyd ymdrechion i gefnogi economi’r DU trwy Brexit a’r ymatebion cychwynnol i’r pandemig, er i’w olynydd Andrew Bailey gymryd yr awenau ym mis Mawrth 2020 wrth i Covid-19 gydio.

Ers ei rôl yn y Banc, mae wedi dal nifer o swyddi yn y sector cyllid ac wedi gweithio fel cynghorydd i Trudeau.

Wrth gael ei gyflwyno gan ei ferch Cleo ar ôl ei fuddugoliaeth, dywedodd Carney: “Pwy sy’n barod i sefyll i fyny dros Ganada gyda mi?”

“Ydy Canada, mae’r Blaid Ryddfrydol yn unedig ac yn gryf ac yn barod i frwydro i adeiladu gwlad well fyth.” meddai.

Wrth gyfeirio at ryfel masnach Donald Trump a’i sôn am wneud Canada yn 51ain talaith yr Unol Daleithiau, dywedodd Carney: “Rydym wedi gwneud hon y wlad fwyaf yn y byd ac yn awr mae ein cymdogion eisiau mynd â ni. Dim diolch.”

Dywedodd hefyd fod Americanwyr “eisiau ein hadnoddau, dŵr, ein tir, ein gwlad”.

“Meddyliwch amdano. Pe baen nhw'n llwyddo, bydden nhw'n difetha ein ffordd ni o fyw…mae America yn bot toddi. Mae Canada yn fosaig.

“Nid Canada yw America. Ni fydd Canada byth yn rhan o America mewn unrhyw ffordd, siâp na ffurf.”