"Bydd ganddo gladin GRC, sef paneli concrit cyfnerth, wedi’u lliwio’n goch gyda tho metel llwyd. Byddai'r ffenestri a'r drysau hefyd mewn metel," medden nhw.

"Gyferbyn â'r siop mae 'na fwriad i godi canopi newydd a fyddai'n cynnig lloches i ymwelwyr. Bydd mewn siâp sgwâr gyda tho o gynfasau rhychiog coch a byddai’r ochrau i gyd yn agored."

Roedd y cynlluniau hefyd yn nodi bod yr adeiladau newydd wedi eu "cynllunio’n ofalus" i gyd-fynd â’r safle presennol. 

'Angen cadw cymeriad'

Wrth siarad yn y cyfarfod ddydd Llun, roedd cynghorwyr lleol wedi dangos cefnogaeth i'r gwaith adfer. 

Dywedodd y Cynghorydd Gareth Jones ei fod yn "gefnogol" i’r cais, yn enwedig o ran adeiladu caffi a chyfleusterau hygyrch.

Ond holodd pam nad oedd llechi’n cael eu defnyddio ar gyfer thoeon y siop a'r ganolfan ymwelwyr.

"Mae’r cynnig yn creu amgylchedd iach a bywiog ac yn gwella profiad yr ymwelydd, bydd yn arwain at fwy o ymwelwyr yn dod i’r safle yn y dyfodol," meddai. 

"Mae’r gwaith adfer a’r addasiadau yn hanfodol ac yn dderbyniol."

Ond ychwanegodd ei fod yn teimlo'n "anghyffyrddus" nad oes cynlluniau i roi llechi ar y toeau.

"Wedi’r cyfan, mae adeiladau ar draws y byd wedi’u toi â llechi o’r fan hon, felly dwi’n meddwl tybed pam na wnaethon nhw ddewis llechi?" gofynnodd.

Fe wnaeth y swyddog cynllunio Keira Sweenie amddiffyn y syniad.

"Weithiau roedd defnydd gormodol o lechi yn gwneud adeiladau newydd yn fwy anodd eu darllen a bydd yn haws dehongli fel ychwanegiad modern yn hytrach nag adeilad traddodiadol," meddai.

Dywedodd y Cynghorydd Elfed Williams ei fod wedi siarad â’r Cynghorydd Gwilym Evans, y ddau yn cynrychioli ward leol.

Gyda’i gilydd roedden nhw wedi penderfynu nad oedden nhw'n gwrthwynebu'r cynlluniau. 

"Os gwelwch yn dda, gofynnwn iddynt gadw cymeriad yr adeiladau fel y buont yn y gorffennol," meddai.

Mae'r Cynghorydd Edgar Owen wedi argymell caniatáu'r cynllun yn unol ag argymhellion y swyddog cynllunio.