Fe allai prifysgolion Prydain elwa o ganlyniad i ail dymor Donald Trump fel arlywydd yr Unol Daleithiau, yn ôl adroddiad newydd sydd wedi ei gyhoeddi.

Mae’n bosibl y bydd addysg yr Unol Daleithiau “yn colli rhywfaint o’i lewyrch i fyfyrwyr rhyngwladol” a gallai prifysgolion Prydain weld cynnydd yn nifer y myfyrwyr tramor oherwydd y newid mewn arweinyddiaeth yn y Tŷ Gwyn, yn ôl y Cyngor Prydeinig.

Fe allai agweddau mwy cyfyng yn yr Unol Daleithiau, Canada ac Awstralia arwain at y gwledydd hynny yn troi cefn ar ddarpar fyfyrwyr rhyngwladol, a fyddai o ganlyniad yn darparu “pwll recriwtio parod” i brifysgolion y DU, meddai ymchwilwyr.

Mae arweinwyr prifysgolion yn y DU wedi rhybuddio am bryderon ariannol sylweddol o ganlyniad i gwymp yn nifer y myfyrwyr rhyngwladol a rhewi ffioedd dysgu sy’n cael eu talu gan fyfyrwyr o'r DU.

'Newyddion da'

Dywedodd adroddiad y Cyngor Prydeinig: “Er mai ansicrwydd yw’r unig sicrwydd o arddull lywodraethol Trump, fe allai ei ddychweliad fod yn newyddion da i sector y DU yn Nwyrain Asia ac mewn mannau eraill.

“Ynghyd â mwy o gyfyngiadau yn Awstralia a Chanada ar fyfyrwyr rhyngwladol, mae’n debygol y bydd y DU yn elwa ar y myfyriwr a fyddai fel arall wedi astudio mewn gwlad fawr arall sy’n siarad Saesneg ond sydd bellach o bosibl yn ystyried y DU fel y mwyaf croesawgar yn eu plith.”