Mae un o sêr y gyfres Y Cyfweliad ar S4C yn dweud ei fod yn “falch bod Cymru wedi gweld ni” wedi i’r darlledwr gyhoeddi y bydd ail gyfres yn cael ei chomisiynu.

Dros yr wythnosau diwethaf, mae gwylwyr wedi gweld enwogion o Gymru yn cael eu holi gan griw o bobl sydd yn niwrowahanol, yn awtistig neu gydag anghenion dysgu.

Ymhlith y sêr a gafodd eu cyfweld roedd y cantorion Dafydd Iwan, Bronwen Lewis ac Elin Fflur, a'r cyn-chwaraewr rygbi Mike Phillips.

Yn cynnwys cwestiynau am ddillad isaf o’u dewis, i dreulio amser yn y carchar a heriau gyda beichiogi, “doedd ‘na ddim pwnc yn cael ei osgoi o gwbwl,” meddai un o’r holwyr, Terry Tuffrey o Flaenau Ffestiniog.

Image

Cyn i’r bennod olaf gael ei darlledu nos Fawrth, cafodd dangosiad arbennig ei gynnal ym Mlaenau Ffestiniog er mwyn i’r holwyr hollbwysig gael ei wylio cyn y cyhoedd.

Yn ystod y digwyddiad, fe gafodd y criw wybod bod S4C wedi comisiynu dwy gyfres ychwanegol o’r rhaglen. Roedd yr ymateb yn un unfrydol bositif.

Wrth siarad â Newyddion S4C, dywedodd un o holwyr y rhaglen, Mair Jones o Benisarwaun, ei bod wedi mwynhau’r profiad o ffilmio’r rhaglen “yn arw”.

Yn byw gydag anghenion dysgu ysgafn o ganlyniad i oedi datblygiadol cyffredinol, mae Mair yn gweithio fel prentis gofal iechyd yn Ysbyty Gwynedd.

“Mae o di bod yn brofiad grêt i bobol gal bod yn mwy ymwybodol o be ydi anghenion dysgu ag i pobol gal chwerthin, ella gal bach o dagrau.

“Achos ti ddim yn gweld o mor aml a di pobol ddim yn dallt be di anghenion dysgu, a mae o wedi bod yn grêt dwi’n meddwl i’r cynulleidfa adra gal gweld bod pobol efo anghenion dysgu yn gallu bod yn pobol clyfar iawn yn y byd.”

Image

Ychwanegodd Terry Tuffrey, sy'n 25 oed ac yn gweithio i gwmni teledu Tinopolis sy'n cynhyrchu'r rhaglen Heno: “Nes i wirioneddol fwynhau cael y profiad yma o allu cyfweld, ond hefyd meddwl am gwestiynau da ni wastad wedi bod eisiau gofyn wrth selebs.”

'Anhygoel'

Yn ogystal â holi selebs yn dwll, roedd yr holwyr yn cymryd rhan mewn perfformiadau cerddorol drwy’r gyfres.

Un arall oedd ymysg y gynulleidfa oedd Fflur Harman Pierce o Ddyffryn Nantlle. Rhai blynyddoedd yn ôl fe gafodd Fflur, sy’n 30 oed, ddiagnosis o awtistiaeth.

“Da chi di gweld y sioe, mae ‘na gymaint o bobol yma efo sgiliau anhygoel a wir dwi’n gallu gweld nhw’n mynd ymlaen i neud pethau anhygoel yn bywyd nhw. 

“A dwi’n mor falch bo fi di bod yn rhan o weld hyderon pobol yn tyfu, a dwi mor falch bod Cwmni Da ag S4C di rhoi’r siawns i’r pobol yma i gyd clywad llais ni.

“Achos lot o’r amsar, eiliad ti’n deud dy fod di’n niwrowahanol, neu efo ryw fath o anabledd dysgu, mae pobl yn llichio chi i’r cohr fel bo chi ddim yn matro a mae’n rili trist.

“Ond dwi’n falch bod Cymru di gweld rŵan we matter, a bod da ni efo rwbath i gyfrannu i bywyd pobol a dwi’n falch bo chi’n clywad ni.”

Fel comediwraig, mae Fflur yn gyfarwydd â pherfformio ar lwyfan.

Ond mae’r profiad o ganu ar gyfres deledu wedi’i hysgogi i feddwl am ddychwelyd i ganu – wedi i Bronwen Lewis ddweud bod ei pherfformiad o Yma o Hyd wedi rhoi “croen gŵydd” iddi hi.

Image

“Dwi’n obsesed efo Dafydd Iwan,” meddai.

“Fel nathon ni weld yn rhaglen Bronwen Lewis, mae gen i Yma o Hyd di tatŵio ar braich fi so dwi’n lyfio Dafydd Iwan. 

“A dwi’n caru perfformio. Dora microphone o flaen fi a dwi tha mwnci, nai dawnsio,  canu a bob dim. 

“Be oedd yn neud o teimlo’n mwy neis odd gael canu o flaen pobol dwi di neud ffrindiau efo, a nhw’n cal clywad fi’n canu yn iawn, oddo’n rili neis. 

“Dwi di gal lot o feedback gan pobol a di gal fy mhwsho i gystadlu yn yr Eisteddfod blwyddyn yma, a pobol yn gofyn i fi os dwi’n mynd i neud Cân i Gymru. Os oed gen chi gân i fi, nai neud o ia!"