Image
'Poenus': Elusen yn chwilio am gartrefi newydd i anifeiliaid wrth gau am y tro olaf
Mae elusen yn Sir Conwy wedi gwneud cais am gartrefi newydd i ddegau o anifeiliaid ar ôl cyhoeddi ei bod yn bwriadu cau ei noddfa.
Dywedodd Noddfa Anifeiliaid Idlewild, sydd wedi'i lleoli ar Fferm Pen Bryn Twrw yn Llanbedr-y-Cennin, ei bod yn chwilio am gartref i 82 o anifeiliaid.
Dros y flwyddyn ddiwethaf, mae'r elusen wedi bod yn ceisio codi £600,000 er mwyn parhau i weithredu, gyda'r les yn dod i ben ym mis Mehefin 2026.
Ond ar ôl degawd o helpu anifeiliaid yn Sir Conwy, dywedodd yr elusen ddydd Llun nad ydy hi "mewn sefyllfa ariannol" i barhau gyda'i gwaith.
Mae'r elusen bellach yn chwilio am gartref i'w hanifeiliaid, gan gynnwys cathod, mulod, moch, defaid, geifr, adar, ceiliogod, gwyddau a thyrcwn.
'Penderfyniad poenus'
Mewn datganiad ddydd Llun, dywedodd Noddfa Anifeiliaid Idlewild ei bod wedi gorfod gwneud "penderfyniad poenus".
"Mae hyn yn anhygoel o anodd, ond gyda thristwch mawr yr ydym yn eich hysbysu y bydd yn rhaid i Noddfa Anifeiliaid Idlewild ddechrau cau ei safle," meddai.
"Fel y gwyddoch eisoes, cyflwynodd ein landlord hysbysiad i ni ac rydym wedi bod yn gweithio'n galed i sicrhau cartref newydd i'r noddfa.
"Er gwaethaf eich rhoddion hael a’ch cefnogaeth, nid ydym mewn sefyllfa ariannol i ymrwymo i brydles, neu bryniant ar safle arall, cyn i’n tenantiaeth ddod i ben.
"Mae wedi bod yn benderfyniad poenus ac anodd i’w wneud ond, fel bob amser, rydym yn canolbwyntio ar les ein hanifeiliaid gwerthfawr."
Ychwanegodd y noddfa ei bod yn gweithio'n galed i sichrau "cartref diogel" i'w hanifeiliaid.
"Mae ein holl ymdrechion ar sicrhau bod ein hanifeiliaid yn cael eu hailgartrefu ac yn parhau i dderbyn y cariad a'r gofal y maent yn eu haeddu," meddai.
"Byddwn yn dod o hyd i gartrefi diogel, cariadus i bob un ohonynt ac ni fyddwn yn cau nes ein bod wedi cyflawni hyn.
"Byddwn hefyd yn sicrhau bod ein gwirfoddolwyr yn cael y gofal a’r cymorth y maent yn eu haeddu."
Bydd yr elusen yn parhau i frwydro dros les anifeiliaid, meddai, gan geisio dod o hyd i ffordd arall o wneud y gwaith "allweddol" yma meddai llefarydd.
