Yn ôl y cwmni, byddant yn cynnig sesiynau i drigolion Llanfairpwll yn egluro sut mae'r dechnoleg newydd yn gweithio.  

Ac yn ôl y darparwr taliadau, Llanfairpwll fydd un o'r cymunedau cyntaf yn Ewrop i arbrofi gyda'r dechnoleg newydd hon sydd yn ceisio arbed amser. 

Mae'n caniatáu i siopwyr dalu masnachwyr ar-lein, heb yr angen i rannu rhifau hir eu cerdyn banc, medd Mastercard.   

Yn hytrach, bydd proses arall ar gael sydd yn cynnig rhifau ar hap neu docyn ar gyfer pob taliad.

Yn ôl y cwmni, mae'r system hon yn gwarchod cwsmeriaid rhag sgamwyr.  

Wrth ymateb i'r datblygiad, dywedodd y cynghorydd sir sy'n cynrycholi Llanfairpwll Dyfed Wyn Jones: “Rydym yn falch o'n treftadaeth, ond rydym hefyd yn deall gwerth arbed amser."

Ymhlith y dinasoedd a threfi eraill a fydd yn rhan o'r cynllun mae Brandys nad Labem-Stara Boleslav yn Tsiecia a Westerhaar-Vriezenveensewijk yn Yr Iseldiroedd. 

Yn ôl gwaith ymchwil a gafodd ei gomisiynu gan Mastercard, mae naw ym mhob 10 o siopwyr (94%) yn rhoi'r gorau i brynu ar-lein pan yn wynebu oedi, rhwystr, neu broblem yn y blwch talu.  

Dywedodd un o reolwyr Mastercard Simon Forbes: “Mewn cwta ddwy flynedd, mae'n ail natur i ni roi ergyd fach ysgafn i'n cerdyn er mwyn talu'n ddigyswllt mewn siop.

“Bellach, mae'n bryd i ni gamu i fyd taliadau ar-lein drwy un clic yn unig.”