Mae rhybudd melyn am law mewn grym ar gyfer de Cymru trwy gydol y diwrnod.

Fe ddaeth y rhybudd i rym am 12.00 ddydd Sul ac mae yn parhau tan 21.00 nos Fawrth.

Dros y dyddiau diwethaf mae'r de wedi profi cyfnodau hir o law, gyda hyd at 34.6mm o law yn cwympo yn Libanus yn y Bannau Brycheiniog ddydd Llun.

Mae Cyfoeth Naturiol Cymru wedi cyhoeddi naw rhybudd 'byddwch yn barod' ar gyfer llifogydd mewn rhai ardaloedd yng Ngheredigion, Sir Gaerfyrddin, Sir Fynwy a Phowys.

Fe allai hyd at 50-60mm o ddŵr gwympo mewn rhai mannau o Gymru.

Mae'r Swyddfa Dywydd yn dweud bydd y glaw yn achosi amodau gyrru anoddach ac o bosib yn golygu y bydd rhai ffyrdd yn gorfod cau.

Hefyd fe allai rhai tai a busnesau brofi llifogydd ac maen nhw'n annog nifer i gymryd camau i baratoi.

Bydd y rhybudd yn effeithio'r siroedd yma:

• Abertawe
• Blaenau Gwent
• Bro Morgannwg
• Caerffili
• Caerdydd
• Casnewydd
• Castell-nedd Port Talbot
• Ceredigion
• Merthyr Tudful
• Pen-y-bont ar Ogwr
• Powys
• Rhondda Cynon Taf
• Sir Benfro
• Sir Fynwy
• Sir Gaerfyrddin
• Torfaen