Mae’r Cymro Elfyn Evans wedi dweud ei fod yn “hapus” gyda'i ganlyniad wedi iddo orffen yn yr ail safle yn rownd agoriadol Pencampwriaeth Rali'r Byd ym Monte Carlo.

Fe orffennodd y seren ralïo o Ddolgellau a’i gyd-yrrwr Scott Martin 18.5 eiliad y tu ôl i’r enillydd Sebastien Ogier ddydd Sul.   

Wrth siarad gyda rhaglen Ralïo wedi’r ras, dywedodd y Cymro: “Mae’r ail safle yn ffordd solid o gychwyn y flwyddyn a ‘da ni’n ddigon hapus efo hynna.”

“Am ddiwedd,” meddai wrth ddisgrifio ei daith dros y llinell terfyn. “Dim ond jyst neud o rownd y cwpwl o gorneli ola ‘na,” ychwanegodd. 

Inline Tweet: https://twitter.com/RalioS4C/status/1883505361035973028

Adrien Fourmaux ddaeth yn drydedd a Kalle Rovanpera ddaeth yn bedwerydd. 

Fe fydd ail rownd y bencampwriaeth yn cael ei chynnal yn Sweden rhwng 13-16 Chwefror.