Mae teyrngedau wedi'u rhoi i yrrwr beic modur a fu farw mewn damwain yn fuan ar ôl cymryd rhan mewn confoi beiciau modur ar gyfer angladd bachgen.

Bu farw Chris Bailey mewn gwrthdrawiad ar ffordd yr A483 rhwng Y Clas-ar-wy a Chleirwy yn agos i’w gartref ger Y Gelli Gandryll.

Roedd yn un o nifer o feicwyr a roddodd deyrnged i Kyle Sieniawski, 14 oed, oedd yn un o’r bobl ieuyngaf yn y DU i gael diagnosis o glefyd niwronau echddygol (motor neuron disease) .

Mae cronfa codi arian wedi’i sefydlu er cof am Mr Bailey. 

Dywedodd datganiad ar wefan y gronfa:"Os ydych chi yma, byddwch chi'n gwybod bod Chris wedi marw'n anffodus ddydd Gwener, 19eg o Ragfyr wrth reidio adref o angladd i gefnogi'r archarwr Kyle. 

"Roedd Chris yn aelod annwyl a pharchus iawn o gangen Valley Commandos MC Powys."

Rhannodd teulu Kyle deyrnged i Mr Bailey hefyd ar dudalen Facebook Stori MND Kyle.

Dywedodd y teulu: "Rydym wedi ein difrodi'n llwyr o glywed bod un o'r beicwyr wedi colli ei fywyd yn drasig wrth deithio adref o angladd Kyle.

"Roedd Chris Bailey yn aelod gwerthfawr o Valley Commandos Powys, ac mae colli ei fywyd ar ôl gwneud peth mor anhygoel yn greulon dros ben.

"Mae ein calonnau'n torri dros ei deulu, ac mae'r Nadolig ond dyddiau i ffwrdd. Gall bywyd fod mor greulon. 

"Rydym yn meddwl am ei holl deulu, ffrindiau, a hefyd ei gymrodyr yn Valley Commandos. Mae'r Nefoedd wedi ennill angel arall yn rhy gynnar."

Llun: Dominic Cross/Just Giving