Mae teyrngedau wedi eu rhoi i Roger Speed, tad cyn-gapten a chyn-reolwr Cymru, Gary Speed, yn dilyn ei farwolaeth.

Wrth roi teyrnged iddo ar y cyfryngau cymdeithasol yn dilyn ei farwolaeth, dywedodd Cymdeithas Bêl-droed Cymru ei fod yn "gefnogwr anhygoel" o'r gamp.

"Mae Cymdeithas Bêl-droed Cymru yn drist iawn o glywed am farwolaeth Roger Speed, a oedd yn gefnogwr anhygoel o bêl-droed Cymru," meddai'r gymdeithas.

"Mae pêl-droed Cymru yn dal ei fab, Gary Speed, yn ddwfn yn ei chalon, a bydd cefnogaeth ac angerdd Roger dros y gêm yn cael eu cofio am byth.

"Mae ein meddyliau gyda'i deulu a'i ffrindiau yn ystod yr amser anodd hwn. Cwsg mewn hedd, Roger."

Dywedodd Clwb Pêl-droed Cei Connah: "Gyda thristwch mawr y mae’r clwb wedi clywed dros nos am farwolaeth yr enwog Roger Speed ​​a oedd yn Noddwr Anrhydeddus i’r clwb ac yn gefnogwr hirdymor yn ogystal â thad y chwaraewr a’r rheolwr Cymreig chwedlonol, Gary Speed.

"Mae ein meddyliau gyda Carol a gweddill teulu Roger ar yr adeg hon."

Bu farw ei fab Gary Speed, a oedd yn rheolwr ar dîm dynion Cymru ar y pryd, ym mis Tachwedd 2011 yn 42 oed.

Bu'n chwarae i Gymru am 14 mlynedd, gan ennill 85 o gapiau rhwng 1990 a 2004 a gwasanaethu fel capten ar 44 achlysur.

Bu'n chwaraewr i nifer o glybiau yn Uwch Gynghrair Lloegr hefyd, gan gynnwys Leeds, Newcastle ac Everton.

Llun: Action Images / Andrew Couldridge Livepic gan Reuters